Ortalyq saılaý komıssııasy 25 sheteldik baıqaýshyny akkredıttedi

ASTANA. QazAqparat – Ortalyq saılaý komıssııasy 19 naýryzda ótetin kezekten tys Májilis saılaýyna 25 sheteldik baıqaýshyny akkredıttedi, dep habarlaıdy QazAqparat tilshisi.

«Búgingi tańda Ortalyq saılaý komıssııasyna Syrtqy ister mınıstrliginen bir shet memleketten, 2 halyqaralyq uıymnan 25 baıqaýshyny akkredıtteý usynyldy. Onyń ishinde Palestına memleketinen – 1, TMD-ǵa qatysýshy memleketterdiń Parlamentaralyq assambleıasynan – 11, EQYU Demokratııalyq ınstıtýttar jáne adam quqyqtary jónindegi bıýrosynan – 13 baıqaýshy. Akkredıtatsııadan ótkizý úshin kelip túsýine qaraı baıqaýshylar jónindegi derekter jańaryp otyratyn bolady», - dedi OSK hatshysy Muhtar Erman.

Onyń atap ótýinshe, elimizdiń Syrtqy ister mınıstrligi saılaýdy baıqaýǵa qatysý úshin halyqaralyq jáne parlamentaralyq uıymdarǵa, Qazaqstandaǵy dıplomatııalyq korpýsqa tıisti shaqyrtý jiberdi.

«Ekijaqty negizde OSK 34 shet memlekettik ortalyq saılaý komıssııasyna shaqyrý jibergen bolatyn», - dedi ol.

Osydan keıin Ortalyq saılaý komıssııasy 25 sheteldik baıqaýshyny akkredıtteý týraly qaýly qabyldady.