Ortalyq referendým komıssııasy Qazaqstan azamattaryna úndeý jasady
«Eger siz daýys berý kúni 18 jasqa tolǵan jáne belsendi saılaý quqyǵyna ıe Qazaqstan Respýblıkasynyń azamaty bolsańyz, sizdiń 2022 jylǵy 5 maýsymǵa taǵaıyndalǵan Qazaqstan Respýblıkasynyń Konstıtýtsııasyna túzetýler boıynsha respýblıkalyq referendýmǵa qatysýyńyzǵa quqyqtyq negiz bar. Sizdiń respýblıkalyq referendýmǵa qatysý quqyǵy bar azamattardyń tizimderine engizilýińiz referendýmǵa qatysý konstıtýtsııalyq quqyǵyńyzdyń iske asyrylý kepili bolyp tabylady. Jergilikti atqarýshy organdar (ákimdikter) tizimderdi sizdiń daýys berýge arnalǵan naqty ýchaskeniń aýmaǵyndaǵy turǵylyqty jerińiz boıynsha turaqty tirkelýińizdiń negizinde jasaıdy. Ýaqytsha tirkelgen azamattar tizimderge berilgen ótinish negizinde engiziledi», delirngen QR Ortalyq saılaý komıssııasynyń resmı saıtynda jarııalanǵan úndeýde.
Ortalyq referendým komıssııasy málimetinshe, daýys berýge arnalǵan ýchaskeler tıisti ákimderdiń sheshimderimen qurylady. Olardyń shekaralary buqaralyq aqparat quraldarynda jarııalanady.
«Óz ýchaskeńizdi bilip, tizimge engizilgenińizdi siz jergilikti atqarýshy organǵa habarlasyp, teksere alasyz. Tizimde bolmaǵan jaǵdaıda, siz ákimdikke tıisti ótinish berýge quqylysyz. 2022 jylǵy 20 mamyrdan bastap óz ýchaskeńizde sizge respýblıkalyq referendýmǵa qatysý quqyǵy bar azamattar tizimindegi ózińiz týraly derekterdi tekserý múmkindigi beriledi. Qandaı da bir ózgerister engizý qajet bolsa, siz dereý ýchaskelik referendým komıssııasyna júgine alasyz. Barshańyzdy azamattyq jaýapkershilik tanytýǵa jáne respýblıkalyq referendýmǵa qatysý quqyǵyńyzdy iske asyrýǵa shaqyramyz!», delingen taratylǵan úndeýde.
Eske salsaq, QR Prezıdenti Qasym-Jomart Toqaev 5 maýsymda respýblıkalyq referendým ótkizý týraly Jarlyqqa qol qoıdy.