Ortalyq organdardaǵy sheshimder óńirlerdiń múddesine oraı qabyldanýy kerek – Senat tóraǵasy
«Qazirgi tańda ortalyq organdardaǵy memlekettik qyzmetshilerdiń kóbiniń óńirlerde jumys tájirıbesi joq. Sondyqtan olar aımaqtardaǵy máselelerdi jaqsy biledi dep aıta almaımyz. Jalpy, Úkimettegi, memlekettik organdardaǵy sheshimder óńirlerdiń múddesine oraı qabyldanýy kerek. Búgin qaralyp jatqan zań jobasy osy máseleni oń sheshýge óz septigin tıgizedi dep senemiz», – dedi Máýlen Áshimbaev Senattyń jalpy otyrysynda.
Sonymen qatar Palata spıkeri óńirlerdiń arasyndaǵy rotatsııa máselesine de nazar aýdardy.
«Bul rette óńirlerdiń arasyndaǵy kadrlyq rotatsııany qamtamasyz etýdiń de mańyzy zor. Mysaly, batystaǵy azamattar shyǵysqa, soltústiktegiler ońtústikke baryp jumys isteıtindeı múmkindikter bolýy qajet. Sondyqtan azamattarymyzdyń ár óńirde jumys isteýine jol ashyp berýimiz kerek. Bul elimizdi birtutas memleket retinde damytýǵa óz úlesin qosatyn mańyzdy qadam ekeni sózsiz», – dedi Senat tóraǵasy.
Aıta keteıik, búgin Senat otyrysynda depýtattar «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyn qarady.
Máýlen Áshimbaev zań qabyldanyp, Memleket basshysy qol qoıǵannan keıin onda kórsetilgen normalar qaǵaz júzinde qalmaı, tıisti memlekettik organ rotatsııa mehanızmderin dáıekti túrde iske asyrýy kerektigin atap ótti.
Budan buryn habarlanǵandaı, agenttik basshysy basqa óńirge aýysqan memlekettik qyzmetshilerge rotatsııalyq tólem beriletinin, bul qarajat páter jaldaýǵa baǵyttalatynyn aıtty.
Sonymen qatar, memlekettik qyzmette qashyqtan jumys isteý jáne ıkemdi jumys kestesin retteý quzyretin agenttikke berý qarastyrylǵan.
Memlekettik basqarý akademııasy túlekteriniń mindetti jumys óteý tártibine ózgerister engizilmek.