Ortalyq memlekettik arhıvke 100 jyl toldy

ALMATY. QazAqparat – Búgin Almatyda Táýelsizdiktiń 30 jyldyǵyn merekeleý aıasynda QR Mádenıet jáne sport mınıstrliginiń Arhıv isteri jáne qujattamany basqarý komıteti QR Ortalyq memlekettik arhıviniń 100 jyldyǵyna arnalǵan saltanatty is-shara ótti. Bul týraly QazAqparat mınıstrliktiń baspasóz qyzmetine silteme jasap habarlaıdy.

Іs-sharaǵa Mádenıet jáne sport mınıstri Aqtoty Raıymqulova, sheteldik qonaqtar, respýblıkalyq jáne oblystyq arhıvter basshylary men ardagerleri qatysty.

Mereke Qazaqstan Respýblıkasy Ortalyq memlekettik arhıviniń ǵımaratyna ornatylǵan «1921-2021 jj. Qazaqstan Respýblıkasynyń Ortalyq memlekettik arhıvine 100 jyl» atty memorıaldy eskertkish taqtanyń ashylý saltanatynan bastaldy.

Sonymen qatar sońǵy ýaqytta shetelderden alynǵan kundy arhıv kujattarynyń kóshirmelerinen daıarlanǵan «Jaýhar jádigerler» atty kórme men arhıvtiń 100 jyldyq mereıtoıyna oraı daıyndalǵan jáne basyp shyǵarylǵan qujattardyń ǵylymı jınaqtarynyń tusaýkeseri ótkizildi.

Saltanatty jıynda Qazaqstan Respýblıkasynyń Prezıdenti Qasym-Jomart Toqaevtyń quttyqtaý haty oqyldy.

«100 jyldyq tarıhynda Ortalyq memlekettik arhıv álemdegi eń iri arhıvterdiń birine aınaldy, ol eń baı jáne qaıtalanbas tarıhı qujattardy biriktire aldy, ózindik damý joly men ishki dástúrin qalyptastyrdy. Osy oraıda arhıv qyzmetkerleriniń baǵa jetpes úlesi men eńbegi laıyqty baǵalanýǵa tıis. Bul baǵytta mınıstrlik birqatar jumystar atqardy. Qazaqstan Respýblıkasy Táýelsizdiginiń 30 jyldyǵyna oraı alǵash ret 100-den astam arhıv qyzmetkerleri «Arhıv salasynyń úzdigi» vedomstvolyq nagradasyna ıe boldy. Sondaı - aq, 22 jeltoqsanda alǵash ret kásibı mereke «Arhıvshi kúnin» atap ótemiz»,-dep jazylǵan Memleket basshysynyń quttyqtaý hatynda.

Іs-shara barysynda Mádenıet jáne sport mınıstri Aqtoty Raıymqulova mereıtoıǵa qatysýshylardy Ortalyq memlekettik arhıvtiń 100 jyldyq mereıtoıymen quttyqtap, ǵasyr buryn qurylǵan arhıvtiń mereıtoıy - tarıhı sanasy qalyptasqan memleket úshin mańyzdy oqıǵa ekenin aıtty.

«Kez kelgen memleket úshin arhıv qyzmetiniń strategııalyq mańyzy bar. Aqparattyq tehnologııalardy damytý nátıjesinde búgingi tańda arhıv kózderi ulttyq resýrstardyń biri jáne ulttyq biregeılikti tárbıeleýdiń mańyzdy kózi ekeni anyq. Sondaı-aq, tuǵyrly Táýelsizdigimizdiń 30 jyldyǵyn atap ótýdiń negizgi tujyrymdamasy jyl basynda jaryq kórgen Memleket basshysy Qasym-Jomart Kemeluly Toqaevtyń «Táýelsizdik bárinen qymbat» atty maqalasynda jan-jaqty atap kórsetildi.

Osy oraıda Qazaqstan Respýblıkasynyń Tuńǵysh Prezıdenti, Elbasy Nursultan Nazarbaev arhıv salasy týraly «Arhıv - qaǵaz qoımasy emes, nár berýshi káýsar bulaq», dep atap ótken bolatyn. Táýelsizdigimizdiń 30 jyldyǵymen tuspa-tus kelip otyrǵan bul aıtýly mereke – barsha halqymyzdyń merekesi», - dedi Mádenıet jáne sport mınıstri.

Budan soń Aqtoty Raıymqulova birqatar arhıv salasynyń qyzmetkerlerin «Arhıv salasynyń úzdigi» tósbelgisimen jáne «Qazaqstan Respýblıkasynyń ortalyq memlekettik arhıvine – 100 jyl» mereıtoılyq medalimen marapattady.

Sonymen qatar alqaly jıynda «Qazaqstan Respýblıkasynyń ortalyq memlekettik arhıvine - 100 jyl» atty derekti fılmi, QR Táýelsizdiginiń 30 jyldyǵyna, Jambyl Jabaevtyń 175 jyldyǵyna jáne Roza Baǵlanovanyń 100 jyldyǵyna arnalǵan fılmder kórsetildi.

Aıta ketsek, Qazaqstan tarıhyndaǵy alǵashqy memlekettik arhıv 1921 jyly 1 qyrkúıekte Qazaq AKSR-nyń tuńǵysh astanasy – Orynbor qalasynda qurylǵan.