Ortalyq ǵylymı kitaphanany Ulttyq ǵylym akademııasyna berý múmkin emes - Ashat Aımaǵambetov

NUR-SULTAN. QazAqparat – Ortalyq ǵylymı kitaphanany QR Ulttyq ǵylym akademııasynyń qurylymyna berý múmkin emes. Bul jaıynda Májilis depýtattarynyń saýalyna QR Oqý-aǵartý mınıstri Ashat Aımaǵambetovtiń jaýabynda aıtylǵan, dep habarlaıdy QazAqparat tilshisi.

«Burynǵy Qazaqstan Respýblıkasy Ulttyq ǵylym akademııasynyń quramynda bolǵan Ortalyq ǵylymı kitaphana Qazaqstan Respýblıkasy Úkimetiniń 2010 jylǵy 11 aqpandaǵy №84 qaýlysymen «Ǵylym ordasy» respýblıkalyq memlekettik kásiporny quramyna engizilgen. Búgingi kúni Ortalyq ǵylymı kitaphana kásiporynnyń jetekshi qurylymdyq bólimderiniń biri bolyp tabylady. Osyǵan baılanysty, Ortalyq ǵylymı kitaphanany «QR UǴA» respýblıkalyq qoǵamdyq uıymynyń qurylymyna berý múmkin emes», - dep atap ótedi mınıstr jaýabynda.