Ortalyq Azııadaǵy shetel ınvestıtsııasynyń 75 paıyzy Qazaqstanǵa tıesili – Memleket basshysy
«Jaqynda baýyrlas eldermen birlesip, Túrki keńesin tolyqqandy uıymǵa aınaldyrdyq. Osylaı túrki tildes memleketter yntymaǵynyń jańa kezeńi bastaldy. Qazaqstan alyp qurlyqtyń dál ortasynda tur. Bul geografııalyq turǵydan tıimdi. Bizdiń tóńiregimizde beıbitshilik beldeý qalyptasty. El ishindegi ahýal turaqty. Syrty ekonomıkalyq qarym-qatynasqa barynsha ashyqpyz. Munyń bári ınvestorlar úshin óte qolaıly jaǵdaı. Búginde Ortalyq Azııadaǵy shetel ınvestıtsııasynyń 75 paıyzy Qazaqstanǵa tıesili», - dedi Memleket basshysy.
Onyń aıtýynsha, Qazaqstan osynyń arqasynda óńirdegi ekonomıkalyq kóshbasshyǵa aınalyp otyr.
«Úkimettiń jáne dıplomattardyń aldynda turǵan asa mańyzdy mindet - aımaqtyń kóshbasshylyq rólin odan ári nyǵaıtý. Osy jumystyń qarqynyn báseńdetýge bolmaıdy. Búkil álemdi pandemııa jaılaǵanyna 2 jylǵa jýyqtady. Onyń saldary Qazaqstanǵa da ońaı tıgen joq. Bizdiń dıplomatııalyq korpýs osy kúrdeli kezeńde joǵary deńgeıde qyzmet etti. Sheteldegi myńdaǵan azamatymyzǵa kómek kórsetti», - degen Qasym-Jomart Toqaev osynaý kúrdeli kezeńde dıplomattardyń tynymsyz eńbek etkenin atap ótti.
«Syrtta qalyp qoıǵan otandastarymyzdy elge alyp kelý úshin olar tıisti jumysty atqardy. Dıplomattarymyzdyń arqasynda Qazaqstanǵa gýmanıtarlyq kómek jetkizildi. Biz de birqatar memleketterge qoldaý kórsettik. Vaktsınalyq dıplomatııanyń arqasynda Ortalyq Azııadaǵy indetke baılanysty ahýaldy turaqtandyrýǵa úles qostyq. Túrli qıyndyqqa qaramastan, sizder aldymyzda strategııalyq mindetterdi oryndap kelesizder», - dedi Memleket basshysy.