Ortalyq Azııadaǵy árbir eldiń turaqtylyǵy tutas aımaqtyń damýyna áser etedi – Qazaqstan Prezıdenti
«Álemdik tarıhtyń qazirgideı qıyn kezeńinde bizge bolashaqtyń aıqyn jáne pozıtıvti obrazynyń bolýy burynǵydan da mańyzdy. Bizdiń ári qaraıǵy yntymaqtastyǵymyz týraly óz kózqarasymdy tómendegi negizgi baǵyttar arqyly usynǵym keledi. Birinshisi –qaýipsizdik. Taǵdyrdyń ózi bizdiń elderimizge birge bolýdy jazǵan. Biz ortaq tarıhymyzdy qorǵap, halqymyzdyń ál-aýqaty úshin biryńǵaı bolashaq qurýymyz kerek. Bizdiń memleketterimizdiń árqaısysyndaǵy turaqtylyq pen qaýipsizdik tutas aımaqtyń damýyna tikeleı áser etedi», - dedi Qasym-Jomart Toqaev.
Óz sózinde Prezıdent Ortalyq Azııa elderi men halyqtarynyń negizgi múddelerine súıene otyryp, jańa qaýipterdiń aldyn alý jáne olarǵa ýaqtyly jaýap qatý úshin pármendi quraldardy ázirleý qajettigin aıtty.
«Qazir biz qaýipsizdik máselelerin dástúrli túrde ekijaqty formatta da, UQShU, ShYU, AÓSShK jáne TMD sheńberinde de kóterip kelemiz. Ortalyq Azııa memleketteri basshylarynyń konsýltatıvtik kezdesýlerinde ujymdyq pikir almasýlar ótedi. Sonymen qatar, álemdegi jaǵdaı jyldam ózgerip otyr jáne ózara is-árekettiń qazirgi tetikteri júıeli jetildirýdi qajet etedi. Onyń aıqyn mysaldary – aımaqtaǵy jaǵdaıdy turaqsyzdandyrýǵa tyrysý, qaqtyǵystardy qozdyrý úshin gıbrıdti jáne aqparattyq tehnologııalardy qoldaný. Osyǵan baılanysty elderimizdiń Qaýipsizdik keńesteriniń apparattaryna aldyn alý sharalary tetigin ázirleý men qurý jóninde naqty usynystar engizýdi tapsyrýdy usynamyn», - dedi Memleket basshysy.
Aıta keteıik, elordada «Ortalyq Azııa-Reseı» sammıti bastaldy . Joǵary deńgeıdegi kezdesýge Qazaqstan, Qyrǵyzstan, Ózbekstan, Tájikstan, Túrikmenstan jáne Reseı prezıdentteri keldi, olar altyjaqty formattaǵy yntymaqtastyqtyń keleshegin talqylaıdy.