Ortalyq Azııada lańkestik qaýip kúsheıe túsedi - Erlan Qarın

ASTANA. QazAqparat - Saıasattanýshy Erlan Qarınniń aıtýynsha, Sırııadaǵy soǵysta jeńilgennen keıin DAISh Aýǵanstanǵa bet burdy. Al Ortalyq Azııadan attanǵan sodyrlardyń qaıta oralýy aımaqtaǵy radıkalızmdi ýshyqtyrýy ábden múmkin, dep xabarlaıdy QazAqparat tilshisi.

"Sırııa men Iraktaǵy áskerı-saıası jaǵdaıdyń ózgerýine baılanysty Ortalyq Azııa sodyrlardyń qaıta oralý problemasyna tap bolýy ábden múmkin. Sarapshylardyń málimeti boıynsha atalǵan eki eldiń terrıtorııasynda túrli lańkestik toptardyń quramynda Ortalyq Azııanyń 5 myńǵa jýyq azamaty soǵysty. Endi júzdegen sodyrlar san alýan joldarmen, san alýan maqsattarmen qaıta oralyp jatyr. Budan bólek, "uıqyda jatqan" radıkaldar taǵy bar. Sondyqtan bıyl aımaq elderine lańkestikke qarsy sharalarǵa basa nazar aýdarýǵa týra keledi", - deıdi E.Qarın.

Onyń aıtýynsha, Sırııa men Iraktaǵy soǵysta jeńilgennen keıin DAISh Aýǵanstan jerindegi óz yqpalyn kúsheıtýge tyrysyp jatyr. Qazirdiń ózinde aýǵan jerindegi áskerı jaǵdaı ýshyǵyp tur.

"Sońǵy bir aıda Kabýl jáne basqa da aımaqtarda bolǵan lańkestik áreketterdiń bárin DAISh sodyrlary uıymdastyrǵan. Osydan eki jyl buryn sarapshylar atalǵan terrorıstik uıymnyń yqpaly asyra kórsetildi dep edi. Ókinishke qaraı, olaı emes bolyp shyqty. DAISh Ortalyq Azııaǵa jaqyn jatqan Aýǵanstandaǵy óz yqpalyn kúsheıtip keledi", - dep atap kórsetti E.Qarın.

Aıta keteıik, búgin Qazaqstannyń xalyqaralyq qatynastar keńesi (QHQK) bıylǵy jyldyń mańyzdy oqıǵalaryn jarııalady. Sarapshylardyń boljamyna sáıkes, aǵymdaǵy jylda Ortalyq Azııanyń ekonomıkasy ósedi. Budan bólek, Ortalyq Azııa basshylary 2005 jyldan beri alǵash ret kezdesýi múmkin degen tuspal bar.