Ortalyq Azııada kóshi-qon jónindegi keńesshi organ kerek - Muratbek Imanalıev

ASTANA. QazAqparat - Ortalyq Azııa elderi halyqaralyq uıymdarmen birlese halyq kóshi-qony boıynsha konsýltatıvtik organ qurýy qajet. Bul týraly Astanada «Ortalyq Azııadaǵy aımaqtyq jáne jahandyq qaýipsizdiktiń jańa syn-qaterleri men qadamdary» atty halyqaralyq konferentsııada Qyrǵyzstannyń burynǵy syrtqy ister mınıstri jáne ShYU-nyń eks-bas hatshysy Muratbek Imanalıev málim etti, dep habarlaıdy QazAqparat.

«Taǵy bir ózekti másele - ol túrli halyqaralyq uıymdarmen yntymaqtastyqqa baılanysty. Ókinishke qaraı, mundaı qatynastar tıisti deńgeıde bolmaı tur. Ortalyq Azııa boıynsha kóshi-qonmen jumys turǵysynda qandaı da bir konsýltatıvtik birlesken organ qurǵan mańyzdy bolar edi. Ásirese, Qyrǵyzstan úshin kóshi-qon máselesi tótenshe mańyzdy ári kúrdeli jaǵdaı bolyp otyr. Sáıkesinshe, bul problemany sheshý kerek bolsa da, alaıda ony sheshýdiń jolyn eshkim bilmeıdi. Osy turǵyda halyqaralyq uıymdardyń kómegi, birlesken kúsh-jiger óte mańyzdy», - dep toqtaldy Qyrǵyzstannyń eks-mınıstri.

Sonymen qatar, sarapshy Úndistannyń mıgratsııalyq tájirıbesinen mysal keltirdi. Onyń paıymynsha, kóshi-qon salasynda Ortalyq Azııa elderi iri memleketterdiń tájirıbesine súıenýi úlken qatelik bolady.

«Shetelde úndis mıgranttarmen jumys isteıtin tıisti qyzmet bar eken. Sondaǵy málimetke qaraǵanda, Úndistannan tys elderde 27 mln úndis ómir súrip jatyr. Meniń oıymsha, bul kórsetkish budan da joǵary. Azamattardyń shetelge shyǵýyn yntalandyrý - ol elde úkimet jumysynyń mańyzdy komponenti dep sanaıdy. ıAǵnı tabysty jumysty izdeý men bıznesti damytýǵa úndister shetelge kóbirek shyqqanyn qalaıdy. Eger de Úndistannan halqynyń úshten biri syrtqa ketkenniń ózinde, bul el osy óńirdegi halqynyń sany kóp memleket mártebesin saqtap qalady. Al Qyrǵyzstannan 4 mıllıon azamatynyń 1,5 mıllıony shetelge ketse, onda bul jaǵdaı eldiń egemendigine aýyr soqqy bolady», - dedi M. Imanalıev.

Osy oraıda ol etnıkalyq tegine nemese dinı ustanymyna qaramastan, árbir qyrǵyzstandyq el egemendiginiń qorǵaýshysy bolatynyn atap ótti.

«Úshjaqty demografııalyq qysym jaǵdaıynda Qyrǵyzstan úshin kóshi-qon ahýaly eń ózekti problema bolyp tur. Meniń oıymsha, halyqaralyq uıymdar bul baǵytta tıisti jumystardy atqara alady», - dedi ShYU-nyń eks-bas hatshysy.