Ortalyq Azııada alǵash ret Qazaqstanda ákimderdi halyq saılaıdy – Aıdos Sarym

NUR-SULTAN. QazAqparat – Parlament Májilisiniń depýtaty Aıdos Sarym «Qazaqstan Respýblıkasyndaǵy saılaý týraly» QR Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zań jobasyna pikir bildirdi, dep habarlaıdy QazAqparat.

Zań jobasynda aýdan ákimderin saılaý, Parlament Májilisine saılaý kezinde saıası partııalardyń ótý shegin 7%-dan 5%-ǵa deıin tómendetý jáne barlyq deńgeıdegi saılaý bıýlletenderine «barlyǵyna qarsymyn» grafasyn engizý usynystary aıtylǵan edi.

Memleket Basshysynyń ótken jylǵy 1 qyrkúıektegi joldaýyndaǵy tapsyrmasyn iske asyrý barysynda aýdandyq mańyzy bar qalalardyń, aýyldardyń, kentterdiń, aýyldyq okrýg ákimderin tikeleı saılaýdy engizý boıynsha «Saılaý týraly» Konstıtýtsııalyq zańǵa ózgerister engizý kózdelgen.

«Bul – saıası júıeni, eldegi qoǵamdyq ómirdi odan ári demokratııalandyrýǵa baǵyttalǵan óte mańyzdy tarıhı qadam. Ortalyq Azııada alǵash ret Qazaqstan tikeleı halyqtyń qatysýymen ákimderdi saılaýǵa kóshetinin de atap ótý kerek. Meniń oıymsha, bul qoǵam men bıliktiń, azamattar men memlekettiń jaqyndasýyna jáne azamattardy anaǵurlym jaýapty saılaýshylar etýge, jergilikti máselelermen aınalysýǵa jáne óz ókilderi arqyly basqarý sapasyn jaqsartýǵa yqpal etedi. Óıtkeni barlyǵyn keshendi túrde qarastyrý kerek», - dedi Aıdos Sarym agenttik tilshisine bergen suhbatynda.

Sonymen birge, Májilis depýtaty bıýdjetti jergilikti deńgeıge berý, ıaǵnı bıýdjettiń tórtinshi deńgeıi dep atalatyn naýqandy eske saldy.

«Bıyl salyqtyń qosymsha tórt túri jergilikti qaýymdastyq ákimderiniń qaramaǵyna berildi. Sondaı-aq, azamattardyń ózderi Jer kodeksiniń qalaı iske asyp jatqanyn, jerdiń qanshalyqty utymdy paıdalanylatynyn, adamdar salyqty qalaı tóleıtinin, kassalyq apparattyń bar-joǵyn belsendi qadaǵalaýy kerek. Osyndaı máselelerdiń barlyǵy túpkilikti qabyldanatyn sheshimderdiń, memlekettik basqarýdyń sapasyn jaqsartyp, eldegi senimsizdik deńgeıin tómendetýi tıis. Jalpy bul uzaq merzimdi nátıjesi bar óte mańyzdy qadam dep oılaımyn. Biz partııalyq, saıası júıeni damytýdy, azamattardy jaýapty etý qajettigin jıi aıtamyz. Bul qadamdardyń barlyǵy soǵan baǵyttalǵan. Adamdar óz ókilderin saılaýdy úırense, jergilikti bıýdjetpen jáne ony tolyqtyrýmen aınalyssa, azamattar damı túsedi, memleketke, bıýdjetke jáne basqa da máselelerge múldem basqa kózqaras bolady», - deıdi Aıdos Sarym.

Aıta keteıik, qazir elimizde 2 345 ákimshilik-aýmaqtyq birlik bar. Ony ishinde, bıylǵy ekinshi jartyjyldyqta 836 ákim tikeleı daýys berý arqyly saılanady.

«Bizdegi ákimder ár ýaqytta máslıhattar arqyly taǵaıyndalǵan. Bıyl 836 ákimniń merzimi aıaqtalyp, tıisinshe jańa elektoraldy júıege aýysady», - dedi A. Sarym.