Ortalyq Azııada alǵash ret kásibı etnosaıasattanýshy mamandar oqytylýda
QR Aqparat jáne qoǵamdyq damý mınıstrliginiń bastamasymen 2021 jyldyń qyrkúıeginen bastap L.N.Gýmılev atyndaǵy EUÝ-de etnosaıasattanýshy-magıstrlerdi daıyndaý boıynsha eki jyldyq bilim berý baǵdarlamasy júzege asyryla bastady. Bul - etnosaralyq qatynastar damýynyń saıası sharttylyǵyn zertteıtin kásibı mamandardy daıarlaýǵa baǵyttalǵan Qazaqstan men Ortalyq Azııadaǵy alǵashqy bilim berý baǵdarlamasy.
Osy baǵdarlama boıynsha bilim alǵan mamandar etnosaralyq ahýaldy zerdelep, memlekettik organdar men zertteý ortalyqtaryna saraptama daıyndaı alady dep josparlanýda.
Baǵdarlama kásibı standarttarǵa sáıkes jasalǵan. Sondaı-aq baǵdarlama oqytýdyń bes negizgi nátıjesine - bilim men túsiný, bilimdi praktıkada paıdalaný, tujyrymdaý, qarym-qatynas pen oqý salasyndaǵy sheberlikke negizdelgen Dýblındik deskrıptorlardy eskeredi.
Budan basqa, baǵdarlama Eýropalyq biliktilik júıesin (EJK) eskeredi. EJK - ulttyq bilim berýdiń biliktilik júıelerimen salystyrmaly, barlyq deńgeıdegi bilim berý biliktiliginiń jalpylanǵan qurylymyn sıpattaıtyn negizdemelik qurylymy bar júıe.
Aıta keteıik, Qazaqstanda jáne Ortalyq Azııada alǵashqy etnosaıasattanýshy-magıstrlerdi daıyndaý boıynsha bilim berý baǵdarlamasynyń tusaýkeseri Qazaqstan halqy Assambleıasynyń XXIX sessııasy qarsańynda 2021 jyldyń 28 sáýirinde ótti.
Qazirgi ýaqytta «Etnosaıasattaný» bilim berý baǵdarlamasy aıasynda «Qazirgi álemdegi etnosaıası úderister», «Qazaqtaný», «Halyqtaný», «Qoǵamǵa qyzmet etý» jáne taǵy da basqa ınnovatsııalyq pánder oqytylýda.