Ortalyq Azııa jastarynyń medıasaýatyn arttyrý úshin oıyn platformasy qoldanylady
Joba arqyly Qazaqstan, Qyrǵyzstan, Ózbekstan jáne Tájikstan jastary oıyn oınaı otyryp upaı jınaıdy jáne olardy mobıldi birlikter men baǵaly júldelerge aıyrbastaı alady.
«Bizdiń oıyndyq tájirıbemizdiń maqsaty – Ortalyq Azııa elderiniń jastaryna jalǵan aqparat pen óshpendilik tilin anyqtaýdyń mańyzdy daǵdylary men ádisterin nyǵaıtýǵa kómektesý. Bul aımaqtaǵy medıasaýat deńgeıi joǵary emes. Kóp jaǵdaıda qoǵamda medıanyń demokratııalyq qoǵamdaǵy róli men jaýapkershiligi týraly tereń bilim bolmaıdy. Tutas álemdegi sekildi Ortalyq Azııa jastary da negizinen onlaın resýrstar men áleýmettik jelidegi aqparatqa senedi. Bul rette dástúrli medıa resýrstary ınternettegi óshpendilik tili men jalǵan aqparatqa balama bere almaı otyr. Nátıjesinde, qoǵam manıpýlıatsııaǵa tap bolady «, - delingen MediaNet habarlamasynda.
Ásirese, jastardyń shalǵaıdaǵy aýyldyq jáne qalalyq jerlerde turatyn az qamtylǵan osal sanattaryn bilim berý sharalaryna tartý qıynǵa soǵady.
«Kóbinese mundaı jastar dástúrli bilim berý baǵdarlamalaryna qatysa almaıdy nemese qatysqysy kelmeıdi jáne ádettegideı olarmen onlaın jumys isteýge de yntaly bolmaıdy. QLEVER oıyn platformasy ınnovatsııalyq jáne ınteraktıvti oıyndar arqyly máseleniń yqtımal sheshimin usynady jáne jastardy mobıldi birlikterden smartfondarǵa deıingi júldelermen yntalandyrady. Osylaısha, bizdiń maqsatymyz – myńdaǵan az qamtylǵan jastardy jobaǵa qatystyryp, olardyń óshpendilik tiline, ásirese, áleýmettik jelilerdegi nasıhattaý men jalǵan aqparatqa qarsy tabandylyǵyn arttyrý.
QLEVER qoldanbasyn tegin júkteýge bolady, onlaın túrde qoljetimdi.
Platformany úkimettik emes uıymdar toby – IREX Europe ÚEU (Frantsııa), BAQ-ty qoldaý ortalyǵy (Qyrǵyzstan), MediaNet Halyqaralyq jýrnalıstıka ortalyǵy (Qazaqstan), Zamanaýı jýrnalıstıkany damytý ortalyǵy (Ózbekstan) jáne «Gýrdofarıd» qoǵamdyq uıymy (Tájikstan) qurǵan jáne Eýropalyq Odaq qarjylandyrǵan.