Ortalyq Azııa ombýdsmenderi óńirlik yntymaqtastyq tuǵyrnamasyn qurýdy qoldaıdy

ASTANA. QazAqparat - Almatyda QR Adam quqyqtary jónindegi ýákil mekemesi men BUU Adam quqyqtary jónindegi Joǵarǵy komıssary jáne BUU Damý baǵdarlamasynyń ókildikteri birlesip Óńirlik keńes ótkizdi. Jıyn «Ulttyq quqyq qorǵaý mekemeleriniń qoldaýy boıynsha Ortalyq Azııa bastamasy» jobasy aıasynda júzege asyp otyr, dep habarlaıdy QazAqparat.

Keńester barysynda Qazaqstan, Qyrǵyzstan, Tájikstan, Túrikmenstan men Ózbekstannyń ombýdsmenderi jáne halyqaralyq sarapshylar adam quqyqtary salasyndaǵy óńirlik yntymaqtastyqqa qatysty máselelerdi talqylady. Sondaı-aq birlesken jobalardy iske asyrý maqsatynda quqyq qorǵaý salalarynyń basym baǵyttary belgilendi.

Kún tártibinde jahandyq sıpatqa ıe bolǵan áskerı qaqtyǵystardy, adam quqyqtaryn jappaı buzýdy, bosqyndar aǵynyn týdyratyn terrorızm men ekstremızmniń aldyn alýdaǵy yntymaqtastyq máselesi qaraldy.

Toqtala ketetin jaıt, «Astana club» sarapshylarynyń jaqynda ótken otyrysynda Qazaqstan Prezıdenti Nursultan Nazarbaev osy qubylystarǵa tolyqqandy baǵa bergen bolatyn. Memleket basshysy atap ótkendeı, kedeılik, bilim berý men densaýlyq saqtaýdyń tómen deńgeıi, sondaı-aq elderdiń damý deńgeıi arasyndaǵy kereǵarlyq halyqaralyq lańkestik pen ekstremızm úshin «qunarly orta» bolyp otyr.

Osyǵan baılanysty QR Adam quqyqtary jónindegi ýákil Asqar Shákirov azamattyq qoǵamnyń damýyna jaǵdaı jasaý jáne memlekettilik negizderin nyǵaıtý, áleýmettik turaqtylyqty qamtamasyz etý jolymen ekstremızmniń aldyn alý boıynsha qabyldanatyn sharalar týraly baıandady.

Qazaqstannyń ekstremıstik jáne radıkaldy qaýip-qaterlerge ushyraýdyń tómen dárejesin eskere otyryp, Ombýdsmen radıkaldy kórinisterdiń aldyn alý boıynsha, sonyń ishinde kóshi-qon saıasatyn nyǵaıtý jolymen pármendi sharalar qabyldaýdyń mańyzdylyǵyn atap ótti.

Halyqaralyq quqyq qorǵaý tájirıbesin talqylaý barysynda, ınstıtýtsıonaldyq damýdaǵy tájirıbe almasý jáne adam quqyqtary máselelerindegi ortaq ustanymdardy qalyptastyrý týraly sóz boldy. Sonymen qatar, zorlyq-zombylyq pen ekstremızmniń, kemsitýshiliktiń aldyn alý salasyndaǵy birlesken «jol kartasyn» qabyldaý týraly ortaq pikir aıtyldy.

Ortalyq Azııa elderiniń ombýdsmenderi, BUU konventsııalyq organdarynyń usynymdaryna saı keletin, sondaı-aq turaqty damý maqsattaryn ilgeriletýdegi, óńirlik yntymaqtastyq tuǵyrnamasyn qurýdy qoldaıtyndyqtaryn jetkizdi.