Ortalyq Azııa memleketteri men Qytaı jáne Aýǵanstan arasyndaǵy saýda máselesi talqylandy

NUR-SULTAN. QazAqparat - Beınekonferentsııa rejıminde saýda jáne ózara baılanys máseleleri boıynsha Ortalyq Azııa, Qytaı jáne Aýǵanstan memleketteri Syrtqy ister mınıstrleri orynbasarlarynyń otyrysy ótti, dep habarlaıdy QazAqparat QR SІM baspasóz qyzmetine silteme jasap.

Otyrysqa qatysýshylar óńirlik jáne halyqaralyq kún tártibindegi birqatar ózekti máseleler boıynsha pikir almasty. Negizgi nazar saýda-ekonomıkalyq ózara is-qımyldy jáne tranzıt-kóliktik salasyndaǵy yntymaqtastyqty tereńdetýge aýdaryldy.

Taraptar óńirishilik saýdany keńeıtýdiń, óńirlik jetkizilimder tizbeginiń turaqty jáne úzdiksiz jumysyn qamtamasyz etýdiń, sondaı-aq elder ekonomıkalaryn qalpyna keltirý jónindegi birlesken sharalardyń mańyzdylyǵyn atap ótti. Qoldanystaǵy kólik dálizderin paıdalana otyryp, tranzıttik-logıstıkalyq áleýetti nyǵaıtýǵa múddelilik aıtyldy.

Syrtqy saıası vedomstvolar basshylarynyń orynbasarlary koronavırýs ınfektsııasynyń taralýyna qarsy kúrestegi ózara is-qımyldy joǵary baǵalady jáne COVID-19 aldyn alý jáne emdeý boıynsha birlesken sharalardy kúsheıtýge múddelilik bildirdi.

Aýǵanstandaǵy beıbit protsesti ilgeriletý jáne jaǵdaıdy saıası retteý, sondaı-aq onymen saýda-ekonomıkalyq, kólik jáne ınfraqurylymdyq baılanystardy nyǵaıtý máselelerinde ózara tıimdi yntymaqtastyqqa ázirlik bildirildi.

Kezdesýge qatysýshylar, sondaı-aq, halyqaralyq terrorızm men ekstremızmge, esirtkiniń zańsyz aınalymyna, adam saýdasyna, transulttyq uıymdasqan qylmysqa, óńirlik qaýipsizdikke, onyń ishinde halyqaralyq uıymdar sheńberindegi basqa da syn-tegeýrinder men qaterlerge qarsy kúrestegi yntymaqtastyq máselelerin qarastyrdy.