Ortalyq Azııa elderi men Qytaıdyń syrtqy ister mınıstrleri kezdesedi

ASTANA. QazAqparat - 2023 jylǵy 26-27 sáýirde Qazaqstan Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa Sıan qalasynda ótetin «Ortalyq Azııa –Qytaı» dıalog formatyndaǵy Syrtqy ister mınıstrleriniń 4-shi keńesine qatysady, dep habarlaıdy QazAqparat tilshisi.

«Ortalyq Azııa elderi men Qytaıdyń syrtqy saıası vedomstvolary basshylarynyń aldaǵy otyrysynyń negizgi máseleleriniń biri - 2023 jylǵy mamyrda Sıan qalasynda josparlanǵan «Ortalyq Azııa – Qytaı» alǵashqy sammıtine daıyndyq. Budan basqa, kezdesýge qatysatyndar altyjaqty yntymaqtastyqtyń túrli salalaryndaǵy perspektıvalaryn, ıaǵnı kólik-logıstıkalyq ınfraqurylym salasyndaǵy ózara baılanysty nyǵaıtýdy, Ortalyq Azııa elderinen Qytaıǵa aýyl sharýashylyǵy óniminiń eksportyn ulǵaıtýdy, elektrondyq kommertsııany damytýdy, sondaı-aq osy formatqa qatysýshy elderdiń quzyretti organdary arasynda ózara is-qımyldyń jańa tetikterin qurýdy talqylaıdy», - dedi Syrtqy ister mınıstrliginiń resmı ókili Aıbek Smadııarov elordada ótken baspasóz máslıhatynda.

Onyń aıtýynsha, basqosý barysynda óńirlik jáne halyqaralyq kún tártibiniń ózekti máselelerine erekshe nazar aýdarylady. Taraptar ulttyq ustanymdar boıynsha pikir almaspaq.