Ortalyq Azııa elderi qaýipsizdik salasyndaǵy yntymaqtastyqty talqylady
Qazaqstan Respýblıkasy Syrtqy ister mınıstriniń orynbasary Erjan Ashyqbaev BUU-nyń Ortalyq Azııa úshin preventıvtik dıplomatııa jónindegi óńirlik ortalyǵy (OAPDÓO) uıymdastyrǵan Ortalyq Azııa jáne Aýǵanstan syrtqy ister mınıstrleriniń orynbasarlarynyń onlaın-kezdesýine qatysty.
Іs-sharaǵa BUU Bas hatshysynyń saıası máseleler jónindegi kómekshisi Mıroslav Encha, EO-nyń Ortalyq Azııa boıynsha arnaıy ókili Peter Býrıan jáne EQYU janjaldardy aldyn alý ortalyǵynyń dırektory Týýla ıÝrola qatysty.
Kezdesý barysynda qatysýshylar óńirdegi qaýipsizdikke qatysty aǵymdaǵy úrdister men oqıǵalardy, sondaı-aq óńirlik yntymaqtastyqtyń ózekti máselelerin talqylady. COVID-19 pandemııasynan týyndaǵan daǵdarysty eńserý jónindegi ulttyq bastamalar men usynystarǵa erekshe nazar aýdaryldy.
E.Ashyqbaev Qazaqstan Respýblıkasy úkimetiniń daǵdarystan keıingi kezeńge kózqarasyn tanystyryp, sondaı-aq qatysýshylardy elimizdiń COVID-19 jáne onyń saldarlarymen, óńirlik jáne halyqaralyq deńgeıdegi kúrestegi elimizdiń úlesimen tanystyrdy. Sonymen birge, Qazaqstan Ortalyq Azııadaǵy seriktesterine meılinshe kómek kórsetetini jáne BUU-nyń negizgi halyqaralyq bastamalaryn qoldaıtyndyǵy aıtyldy.
Syrtqy ister mınıstriniń orynbasary Ortalyq Azııadaǵy seriktesterdi óńirlik qaýipsizdik salasyndaǵy yntymaqtastyqty nyǵaıtýǵa, sondaı-aq Ortalyq Azııa men Aýǵanstanda ornyqty damý maqsattaryn iske asyrýǵa baǵyttalǵan bastamalaryn qoldaýǵa shaqyrdy.
BUU, EO jáne EQYU ókilderi Ortalyq Azııa men Aýǵanstan memleketteriniń koronavırýs pandemııasynyń jaǵymsyz saldaryn eńserýdegi ózara is-qımylyn oń baǵalady.
Otyrysqa qatysýshylar OAPDÓO, EO jáne EQYU-nyń óńirlik yntymaqtastyqty ilgeriletý jáne óńirdegi beıbitshilik pen qaýipsizdikti nyǵaıtý jónindegi kúsh-jigerin qoldaıtynyn bildirdi.
Aıta keteıik, Qazaqstannyń Tuńǵysh Prezıdenti – Elbasy N.Nazarbaev 2007 jylǵy jeltoqsanda OAPDÓO qurýda bastamashy boldy. Álemde osyndaı BUU-nyń úsh ortalyǵy bar: bireýi - Ortalyq Azııada jáne ekeýi - Afrıkada.
Ortalyq qaqtyǵystardyń aldyn alýǵa jáne qazirgi zamanǵy qaýip-qaterlerge qarsy turý salasyndaǵy óńirlik kúshterge qoldaý kórsetedi.