Ortalyq Azııa elderi arasynda Qazaqstannyń ýrbandalý deńgeıi joǵary
Bul týraly búgin Úkimet otyrysynda Óńirlerdi damytýdyń 2020-2025 jyldarǵa arnalǵan memlekettik baǵdarlamasynyń jobasyn tanystyrǵan Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.
«Búginde 17 óńirde 87 qala men 6,5 myń aýyl bar. 2015 jyldan bastap ýrbandalý deńgeıi 58,2 protsentke deıin ósti. Mıllıon turǵyny bar qalalar sany 3-ke jetti. Negizgi kapıtalǵa salynǵan ınvestıtsııalar 18 iri qalada 1,5 ese artty. »Qazaqstan-2050« strategııasy jáne Qazaqstan Respýblıkasyn 2025 jylǵa deıin damytýdyń strategııalyq jospary aıasynda óńirlik saıasat basymdyǵy basqarylatyn ýrbandalýdy qamtamasyz etý bolyp sanalady», - dedi mınıstr.
Onyń atap ótýinshe, jańa baǵdarlamada eldiń damýy úshin mańyzdy ınstıtýtsıonaldyq jaǵdaılar aıqyndalǵan. Bul – ekonomıkalyq ósý «ortalyqtaryn» qalyptastyrý, óńirlerdiń básekege qabilettiligin arttyrý, barlyq óńirlerde bazalyq ómir súrý deńgeıin qamtamasyz etý.
«Baǵdarlamany ázirleýdiń negizi óńirlerdiń ekonomıkalyq básekege qabilettiligin arttyrý jáne halyqtyń ómir súrý sapasyn jaqsartý boıynsha Elbasy jáne Memleket basshysynyń tapsyrmalary bolyp sanalady. Búginde álemdik jalpy ishki ónimniń 70 paıyzy iri qalalarda qurylady. Bul – jahandyq trend. Resýrstar men ınfraqurylymdy shoǵyrlandyrý arqyly ǵana joǵary ekonomıkalyq ósimge qol jetkizýge bolady», - dedi R.Dálenov.
Mınıstrdiń aıtýynsha, elderdiń básekege qabilettiligi zamanaýı iri qalalardyń bolýymen aıqyndalady. Ýrbandalý shıkizattyq emes jalpy ishki ónimdi arttyrady.
«Ortalyq Azııa elderi arasynda Qazaqstannyń ýrbandalý deńgeıi eń joǵary – 58,2 paıyz. Alaıda ol Ekonomıkalyq yntymaqtastyq jáne damý uıymy elderine qaraǵanda tómen. Ol elderde bul kórsetkish 77 paıyzy quraıdy. Ýrbandalý deńgeıin 1 paıyzǵa arttyrǵanda jalpy ishki ónimniń ósimi 0,12 paıyzǵa jetedi. Sáıkesinshe, ýrbandalý deńgeıi joǵary bolǵan saıyn halyqtyń tabysy da joǵary bolady», - dedi ol.