Ortalyq saılaý komıssııasy Bıbigúl Aqqojınany Senat depýtaty etip tirkedi

<p>Ortalyq saılaý komıssııasy shyǵyp qalǵan depýtattyń ornyna Qostanaı oblysynan Senat depýtatyn tirkedi, dep habarlaıdy <a href="https://kaz.inform.kz/" target="_blank" rel="noopener">Kazinform</a> komıssııaǵa silteme jasap.&nbsp;</p>

Búgin, 26 jeltoqsanda Ortalyq saılaý komıssııasynyń «Qostanaı oblysynan Parlament Senatynyń shyǵyp qalǵan depýtatynyń ornyna 2023 jylǵy 20 jeltoqsanda saılanǵan depýtatty tirkeý týraly» qaýlysyn qabyldaý boıynsha otyrysy ótti.

«Qazaqstan Respýblıkasyndaǵy saılaý týraly» Konstıtýtsııalyq zańnyń 12, 45, 46 jáne 82-baptaryna sáıkes Qostanaı oblysynan QR Parlamenti Senatynyń shyǵyp qalǵan depýtatynyń ornyna saılaý jónindegi daýys sanaý nátıjesi týraly Qostanaı oblystyq saılaý komıssııasy hattamasynyń jáne Ortalyq saılaý komıssııasynyń 2023 jylǵy 21 jeltoqsandaǵy № 105/807 qaýlysynyń negizinde Ortalyq saılaý komıssııasy Bıbigúl Búrkitqyzy Aqqojınany Senat depýtaty retinde tirkeýge qaýly etti.

Sondaı-aq, osy kúni Bıbigúl Aqqojınaǵa Parlament depýtatynyń kýáligi men tósbelgisi tabystaldy. 

Bıbigúl Búrkitqyzy 1971 jylǵy 20 qańtarda Qostanaı oblysynda dúnıege kelgen. Eńbek jolyn Qostanaı memlekettik ýnıversıtetinde psıhologııa oqytýshysy retinde bastady, joǵary bilimin de osy jerden aldy.

2000-2002 jyldary QR Memlekettik qyzmet isteri agenttiginiń Qostanaı oblysy boıynsha departamentiniń mamany bolyp jumys istedi. 2002-2009 jyldary – Qostanaı oblysy ákimdigi Іshki saıasat basqarmasy taldaý jáne monıtorıng júrgizý bóliminiń basshysy.

2009-2016 jyldary Qostanaı oblysy ákimdiginiń Іshki saıasat basqarmasy basshysynyń orynbasary qyzmetin atqardy. Qostanaı qalasy ákiminiń orynbasary laýazymynda boldy. 2017 – 2021 jyldary – Qostanaı oblysy ákimdiginiń Іshki saıasat basqarmasynyń basshysy, oblystyq Qazaqstan halqy Assambleıasy hatshylyǵynyń meńgerýshisi.

2021 jyly Nur Otan partııasy (qazirgi Amanat partııasy) Qostanaı oblystyq fılıaly tóraǵasynyń birinshi orynbasary qyzmetine taǵaıyndaldy. 2022 jyldyń jeltoqsan aıynan osy ýaqytqa deıin Amanat partııasy Qostanaı oblystyq fılıalynyń tóraıymy qyzmetinde boldy.