Ortalyq Azııadaǵy eń uzyn kópirde avtosherý ótti

<p>ÓSKEMEN. KAZINFORM &ndash; Búgin Shyǵys Qazaqstan oblysynyń Kúrshim aýdanynda Buqtyrma sý qoımasy arqyly ótetin kópirdiń salynýyna jáne Respýblıka kúnine oraı saltanatty sharalar ótti.</p>

Óńir turǵyndaryn quttyqtaǵan oblys ákimi Ermek Kósherbaev kópirdiń Prezıdent Qasym-Jomart Toqaevtyń tapsyrmasymen salynǵanyn erekshe atap ótti.

«Bul kópirdi halyq talaı jyl kútti. Endi ol Shyǵys Qazaqstanda kásipkerlikti, týrızmdi jáne logıstıkany damytýdyń mańyzdy strategııalyq nysanyna aınaldy», - dedi aımaq basshysy oblystyń jeti aýdanynyń turǵyndary men mereke qonaqtaryna sóılegen sózinde.

Ermek Kósherbaev kópir qurylysyna tek otandyq mamandar men qurylysshylar tartylǵanyn aıtty.

«Sheteldik ınjenerlerdi bári maqtap jatady. Biraq bizdiń respýblıkada da, oblysta da ózimizdiń bilikti mamandar bar. Olardyń tájirıbesi sheteldikterden esh kem túspeıdi», - dedi Ermek Kósherbaev.

Odan soń ákim kópir qurylysyna súbeli úles qosqan azamattarǵa Alǵys hat tabys etti. Marapattalǵandar qatarynda Abaı oblysy ákiminiń keńesshisi Azamat Qasym bar. Ol respýblıkalyq «Egemen Qazaqstan» gazetiniń ShQO-daǵy menshikti tilshisi bolyp júrgende Prezıdenttiń tapsyrma berýine áser etken maqalany jazǵan bolatyn. Sondaı-aq «Kúrshim» paromynyń kapıtany Altaı Berdikpaev, aǵa kapıtan Serik Nóketaev jáne basqarýshy Qadylbek Jarmuhambetov ta marapatqa ıe boldy.

Osy kúni kópirde avtosherý ótip, túrli sporttyq saıystar men merekelik kontsert uıymdastyryldy.

Osyǵan deıin Astanada Respýblıka kúnine oraı, demeýshilerdiń qoldaýymen merekelik otshashý uıymdastyrylǵanyn jazdyq.