Ortalyq Azııada alǵash ret azamattyq avıatsııanyń óńirlik uıymy quryldy

<p>ASTANA. KAZINFORM — Armenııa, Qazaqstan, Qyrǵyzstan, Tájikstan jáne Ózbekstan kiretin Eýrazııalyq azamattyq avıatsııa konferentsııasy (EACAC) qatysýshy elderdiń avıatsııalyq bıligi ókilderimen Almatyda alǵashqy otyrysyn ótkizdi. Bul týraly Kólik mınıstrliginiń baspasóz qyzmeti málim etti.</p>

EACAC álemdik sala ınstıtýttarymen — IKAO, Eýropalyq komıssııa, IATA jáne basqa da halyqaralyq uıymdarmen jumys sheńberinde óz ustanymyn shoǵyrlandyrýǵa múmkindik beredi.

Baıqaýshy memleket retinde otyrysqa Mońǵolııanyń avıatsııalyq bıliginiń ókilderi qatysty.

Otyrysty Qazaqstan Respýblıkasynyń Kólik vıtse-mınıstri Talǵat Lastaev ashty.

«Eýrazııa óńirinde alǵash ret azamattyq avıatsııa salasynda osyndaı deńgeıdegi uıym qurylýda. EACAC elderimizdiń avıatsııalyq bılik oryndaryna tıimdi ózara is-qımyl jasaýǵa, ushý qaýipsizdigi, avıatsııalyq qaýipsizdik, formaldylyqty jeńildetý, ornyqty damý, avıatsııalyq personaldy daıarlaý salasynda tájirıbe, bilim jáne ozyq tájirıbemen almasýǵa múmkindik beredi jáne, eń bastysy, bolashaq syn-tegeýrinderge daıyndyq kezinde problemalyq máseleler boıynsha sheshimder ázirleý úshin negiz jasaıdy», — dep atap ótti vıtse-mınıstr.

EACAC-tyń negizgi maqsaty — tıimdi úılestirý men ózara is-qımyldy jeńildete otyryp, Eýrazııa aımaǵyndaǵy múshe elderdiń avıatsııalyq bılik oryndary arasynda yntymaqtastyq platformasyn qurý. Osy maqsatta is-sharaǵa qatysýshylar Azamattyq avıatsııanyń Eýrazııalyq konferentsııasyn qurý týraly deklaratsııaǵa qol qoıdy. Qazaqstan tarapynan qujatty QR KM Azamattyq avıatsııa komıtetiniń tóraǵasy Saltanat Tompıeva kýálandyrdy.

Óz sózinde Qazaqstannyń avıatsııalyq ákimshiliginiń bas dırektory Katalın Radý bul bastama úkimetterden de, saladan da aıtarlyqtaı qoldaý alǵanyn atap ótti.

«Eýrazııalyq azamattyq avıatsııa konferentsııasy halyqaralyq avıatsııalyq qoǵamdastyqta pikirler birligi men myqty ókildikti qamtamasyz etý isindegi elderimizdiń kúsh-jigerin jaqsyraq úılestirýge múmkindik beredi. Bul bastama úkimetterden de, saladan da aıtarlyqtaı qoldaý aldy. Biz qazir salalas — ACAO, AFCAC, ECAC, LACAC — jáne negizgi halyqaralyq uıymdarmen seriktestigimizdi nyǵaıta bastadyq», — dedi ol.

Іs-shara barysynda Qazaqstannyń avıatsııalyq ákimshiligin oqytý jónindegi Excellence Center jobasynyń, sondaı-aq «EASAS ınspektorlar bazasy» biryńǵaı platformasyn qurý jónindegi sheshimder tusaýkeserleri ótti.

Otyrys qorytyndysy boıynsha EASAS bas hatshysy bolyp Qazaqstan Respýblıkasynyń Kólik vıtse-mınıstri Talǵat Lastaev, EASAS prezıdenti bolyp Ózbekstan Respýblıkasy Kólik mınıstrligi janyndaǵy Azamattyq avıatsııa agenttiginiń bas dırektory Tahır Nazarov taǵaıyndaldy.

EACAC mindetteri — aımaqtyq yntymaqtastyq pen ózara qoldaýdy nyǵaıtý; ushý qaýipsizdigin, avıatsııalyq qaýipsizdikti arttyrý, formaldylyqty jeńildetý, ushqyshsyz avıatsııanyń turaqty ósýi men damýy úshin jalpy saıasattar men rásimderdi ázirleý jáne engizý, bul azamattyq avıatsııanyń jáne basqa da baılanysty salalardyń tıimdi damýyna yqpal etedi; azamattyq avıatsııanyń halyqaralyq standarttaryn jáne búkil aımaq boıynsha usynylǵan tájirıbelerdi úılestirý jáne engizý; óńir elderiniń avıatsııalyq múmkindikterin nyǵaıtý jáne olardyń halyqaralyq avıatsııalyq arenada bolýyn arttyrý; tehnıkalyq kómek kórsetý jáne avıatsııalyq personaldy daıarlaýǵa qatysý, sondaı-aq óńirde tehnıkalyq resýrstardyń biryńǵaı «pýlyn» qurý.

Aıta keteıik, Azamattyq avıatsııanyń Eýrazııalyq konferentsııasyn (EACAC) qurý týraly bastama alǵash ret 2023 jylǵy mamyrda «Ortalyq Azııanyń turaqty damýy men tranzıttik áleýetin iske asyrý jolyndaǵy energetıkalyq kóshý» atty 1-shi Qazaqstandyq avıatsııalyq dıalogty ótkizý sheńberinde aıtyldy. 2024 jyldyń sáýirinde Týlýzada (Frantsııa) EACAC jobasy IKAO Eýropalyq jáne Soltústik Atlantıkalyq bıýrosynyń (EURNAT-DGCA) azamattyq avıatsııa bas dırektorlarynyń keńesi kezinde usynyldy.

Buǵan deıin habarlaǵanymyzdaı, Kólik mınıstrligi qaýipti júkterdi tasymaldaý erejelerin buzǵany úshin 7,5 mln teńge aıyppul salynǵanyn málim etti.