Ortalyq Azııa turaqtylyq pen qaýipsizdik ortalyǵyna aınalyp keledi – Eýrokomıssııa vıtse-prezıdenti

<p>ASTANA. KAZINFORM &ndash; Eýropalyq komıssııanyń vıtse-prezıdenti Margarıtıs Shınas Ortalyq Azııa men Eýropalyq Odaq arasyndaǵy kólik baılanysy jónindegi ınvestorlar forýmynyń jabylýynda sóz sóılep, EO men Qazaqstan arasyndaǵy áriptestiktiń keleshegi zor ekenin atap ótti.</p>

Brıýsselde Ortalyq Azııa men Eýroodaq arasyndaǵy kólik baılanysyna arnalǵan eki kúndik ınvestorlar forýmy aıaqtaldy.

Seısenbi kúni sharanyń jabylý saltanatynda Eýropalyq komıssııanyń vıtse-prezıdenti Margarıtıs Shınas sóz sóıledi.

«Ortalyq Azııadaǵy kólik baılanysy jónindegi «Global Gateway» (Jahandyq portal) ınvestorlar forýmyn jabý – men úshin úlken mártebe. Biz Eýroodaq pen Ortalyq Azııa arasyndaǵy órshil jáne ózara tıimdi seriktestiktiń odan ári damýyn asyǵa kútemiz», - dedi M.Shınas.

Budan basqa, Eýrokomıssııanyń vıtse-prezıdenti Kazinform agenttiginiń tilshisine bergen eksklıýzıvti túsiniktemesinde Investorlar forýmynyń ıdeıasy – ıdeıalardy iske asyrý, kólik sabaqtastyǵyn ilgeriletý ekenin atap ótti.

«Osy tamasha ıdeıalardyń barlyǵy zertteýdi, ınvestıtsııany, aqshany qajet etedi. Bul sharanyń maqsaty – úkimetti, ınvestorlardy, ulttyq jáne halyqaralyq ınstıtýttardy biriktirý. Bul sharaǵa seriktesterimizdiń belsendi qatysqanyna qýanyshtymyz. Munyń perspektıvaly máni bar», - dep atap ótti M.Shınas.

EK vıtse-prezıdenti sondaı-aq Ortalyq Azııanyń álemde máni artyp kele jatqanyn da atap ótti.

Onyń pikirinshe, aımaq turaqsyz álemdegi turaqtylyq, qaýipsizdik jáne ósý ortalyǵyna aınalyp keledi.

«Qazaqstannyń artyqshylyǵy – Ortalyq Azııadaǵy bes memlekettiń arasynda ekonomıkasy eń jaqsy damyp kele jatqan eń iri memleket bolýynda. Bizde EO men Qazaqstan arasyndaǵy ózara áriptestiktiń keleshegi zor», - dep túıindedi sózin M.Shınas.