Ortaǵasyrlyq tarıhty zertteıtin kadrlar tapshy - Nurlan Atyǵaev
«HІІІ ǵasyrdan bastalǵan Joshy ulysynyń tarıhy HVІІІ-HІH ǵasyrǵa deıin jalǵasty. Óıtkeni, kóp jaǵdaıda tarıhshylar Joshy ulysynyń tarıhyn Altyn orda tarıhymen baılanystyrady. Negizinen Joshy ulysy geografııalyq termın retinde qoldanylyp ketti. Sondyqtan, bul – úlken tarıh. Altyn orda qulaǵannan keıin Joshy ulysy qulap qalmaı, keıingi kezeńderge jalǵasty», - dedi Nurlan Atyǵaev «Joshy ulysy tarıhynyń máseleleri» VІІ tarıhshylarynyń ulttyq kongresinde.
Tarıhshynyń aıtýyna qaraǵanda, Joshy ulysynyń tarıhy – túrki halyqtaryna ortaq tarıh.
«Ortaǵasyrlyq derektermen jumys isteý óte kúrdeli ekenin eskerý kerek. Sebebi, munymen aınalysatyn mamandar Qazaqstanda óte az. Ekinshiden, bul sala kóp qarajatty talap etedi. Shetelde, ásirese Eýropada tarıhtyń bul kezeńin talmaı zerttep jatqandar barshylyq. Óıtkeni, árbir sheteldik kitaphanada jumys isteý úshin ol jaqta aptalap, aılap jatyp eńbektený kerek. Sonymen birge, bizde kadrlyq máselelerdiń de ótkir ekenin aıta ketken abzal. Naqty ortaǵasyrlyq tarıhty zertteıtin kadrlardy daıyndaý máselesi bar. Máselen, bizde shyǵystaný faýltetin bitiretin stýdentter parsy, arab tilderin bilgenimen ǵylymǵa kelgisi joq. Bir sózben, 60-70 myń teńge aılyqpen júrgisi kelmeıdi», - dedi ol.
Nurlan Atyǵaevtyń sózine sensek, tarıhty zertteýde azdap kesheýildep jatqanymyzdy aıtady.
«Máselen, Altyn ordanyń 750 jyldyǵyna baılanysty ótken úlken halyqaralyq forýmǵa qatystym. Qazir tatarlar óte jaqsy jumys istep jatyr. Olar orta ǵasyrlyq derekterdiń birnesheýin aýdaryp, jaqynda Rashıd ad-Dınniń eńbegin orys tiline aýdardy. Qoljazbalardy aýdara bastady. Sondyqtan, biz tatar, túrki halyqtarymen birlese, kóshten qalmaı tarıhty zertteýimiz kerek», - dedi Nurlan Atyǵaev.