Ortaǵasyrlyq Saraıshyqtan kóne keseneniń dromosy tabyldy
Mahambnt aýdanynda ornalasqan tarıhı mekende arheologııalyq qazba jumysy júrip jatyr. Ǵalymdardyń pikirinshe, dál mundaı nysan burynǵy zertteýlerde kezdespegen. HV-XVI ǵasyrlarǵa tán nysan kúıdirilgen kirpishten qalanǵan. Alaıda keseneniń kúmbezi qırap qalǵan. Al jabyq dálizi sol qalpynda saqtalǵan.
«Mundaı keseneler Saraıshyq qalasynda burynda da anyqtalǵan. Biraq olar qatty búlingen edi. Bul keseneniń dromosy tolyq saqtalyp qalǵan. Ázirge aldyn ala boljam boıynsha munda mártebeli adamdar jerlengen bolýy múmkin», - deıdi arheolog Amangeldi Zaınov.
Onyń aıtýynsha, esigi ońtústik shyǵysqa qaraǵan dromostyń uzyndyǵy – 170, bıikti – 60 santımetr. Ázirge dáliz jartylaı qazylǵan. Qazba jumysy úsh bólikke bólip júrgizildi. Dálizge jalǵasqan kólemdi qabirdiń qabyrǵasy tabyldy. Anyqtalǵan qabyrǵanyń uzyndyǵy – 6, bıiktigi – 1 metr, qalyńdyǵy – 55 santımetr.
«Bul keseneni salýǵa sary jáne qyzyl kirpishter paıdalanylǵan. Sary kirpishter – Altyn orda dáýiriniń eski kirpishteri, al qyzyl kirpishter qurylys salynarda kúıdirilip jasalǵany anyq. Bul – Saraıshyqtaǵy eń sırek kezdesetin nysan», - deıdi arheologııalyq qazbaǵa qatysqan stýdent Erasyl Ómirbek.
Dromostyń ońtústik bóliginen sharýashylyq bólme de anyqtalǵan. Qazba kezinde qysh qumyralar men túrli buıym, ortaǵasyrlyq sándik japsyrmalar, mys tıyndar tabylǵan. Arheologııalyq nysan aldaǵy ýaqytta tereń zerttelmek. Ortaǵasyrlyq qaladaǵy qazba jumysyna H.Dosmuhamedov atyndaǵy Atyraý ýnıversıtetiniń 19 stýdenti qatysqan.