Orta kásipkerliktiń damý qarqyny áli de báseń – Memleket basshysy

ASTANA. QazAqparat – «Bıznestiń jol kartasy» men «Qarapaıym zattar ekonomıkasy» baǵdarlamalary birigip, shaǵyn jáne orta kásipkerlikti qoldaıtyn keshendi baǵdarlama ázirlenedi, dep habarlaıdy QazAqparat tilshisi.

Bul týraly Prezıdent Qasym-Jomart Toqaev Parlament palatalarynyń birlesken otyrysynda Qazaqstan halqyna Joldaýynda aıtty.

«Sońǵy jyldary qabyldanǵan sharalardyń arqasynda shaǵyn jáne iri bıznes turaqty damı bastady. Alaıda orta kásipkerliktiń damý qarqyny áli de báseń. Jańa ekonomıkalyq úlgige kóshý úshin ony «qolmen kóterýge» týra keledi. Eń aldymen, orta bıznestiń damýyn tejep turǵan kedergilerdi joıý qajet. Orta kásipkerliktiń basym bóligi ábden damyǵan kezde bólshektenip ketedi. Óıtkeni olarǵa shaǵyn bıznes deńgeıinde qalǵan áldeqaıda «qolaıly», - dedi Memleket basshysy.

Prezıdent Úkimettiń shaǵyn bıznesti ózara birigip, iri kásip ıeleri bolýǵa yntalandyrý úshin zańǵa ózgerister engizýi keregin jetkizdi.

«El naryǵynda belsendi jumys istep jatqan tabysty orta kásiporyndar kóp emes. Olarǵa qoldaý kórsetý qajet. Mundaı kásiporyndardyń árqaısysyna qatysty naqty jospar ázirleý kerek. Sol arqyly olardyń óndiris qabiletin arttyryp, ónim kólemin eki-úsh ese kóbeıtý qajet. «Bıznestiń jol kartasy» jáne «Qarapaıym zattar ekonomıkasy» baǵdarlamalaryn biriktirgen jón. Ony shaǵyn jáne orta kásipkerlikti qoldaıtyn keshendi baǵdarlamaǵa aınaldyrý kerek», - dedi Qasym-Jomart Toqaev.