Orta Azııany Ońtústik Azııa elderimen baılanystyratyn temir jol bes jylda paıdalanýǵa berilýi múmkin

<p>ASTANA. KAZINFORM &ndash; Aýǵanstan, Ózbekstan jáne Birikken Arab Ámirlikteri Transaýǵan temirjol jobasyn tehnıkalyq zertteý boıynsha ózara túsinistik týraly memorandýmǵa qol qoıdy. Bul týraly Avapress habarlady.</p>

Aýǵanstan ulttyq temir jolynyń basshysy Bahtýl Rahman Sharofat 19 aqpan kúni Ózbekstanǵa bardy. Onyń sapary barysynda Ózbekstan men BAÁ ókilderiniń qatysýymen kezdesý ótti. Taraptar Transaýǵan temir joly jobasyn tehnıkalyq-ekonomıkalyq zertteýdi bastaý týraly ózara túsinistik týraly memorandýmǵa qol qoıdy.

Onyń negizinde merdiger kompanııa óziniń qarjylyq resýrstary esebinen Transaýǵan temirjol jobasy boıynsha tehnıkalyq, áleýmettik jáne ekonomıkalyq zertteýler júrgizedi. Keıin zertteý nátıjeleri ınvestıtsııa tartý úshin Aýǵanstan, Ózbekstan jáne Pákistannyń qarjy ınstıtýttary men kásipkerlerine jetkiziletin bolady. Aldyn ala júrgizilgen zertteýler boıynsha, temirjol qurylysy aıaqtalyp, paıdalanýǵa berilýi úshin bes jyl qajet.

Transaýǵan temirjoly jobasy Orta Azııa elderin Aýǵanstan arqyly Ońtústik Azııa elderimen baılanystyrady. Ózbekstan-Aýǵanstan-Pákistan úsh jaqty temirjol jobasynyń uzyndyǵy 760 shaqyrym, qurylys quny 4,8 mıllıard dollarǵa baǵalanyp otyr.