Orta Azııa boıynsha eń jyldam mobıldi ınternet - Qazaqstanda

NUR-SULTAN. QazAqparat – Qazaqstanda mobıldi ınternet jyldamdyǵy bir jylda 48% artqan. Bul kórsetkishke Finprom.kz zertteý júrgizdi, dep habarlaıdy QazAqparat tilshisi.

Resýrstyń jazýynsha, álemde mobıldi keń jolaqty ınternettiń ortasha júkteý jyldamdyǵy bir jylda 38,3% artyp, 2022 jyldyń qańtarynda sekýndyna 29,62 Megabıtke jetken.

Mundaı oń tendentsııada Qazaqstannyń da úlesi bar.

«Qazaqstanda bul kórsetkish qańtar aıynda birden 48%-ǵa, ıaǵnı, 18 Mbıt/sekýndke deıin ósti. Bul – Ortalyq Azııa elderi arasyndaǵy eń úzdik kórsetkish. Odan keıin Qyrǵyzstan (8% nemese 17,45 Mbıt/sek deıin) jáne Ózbekstan (13,85 Mbıt/sek nemese 57,6%) tur. Tájikstan men Túrkimenstanda mobıldi ınternet jyldamdyǵy - álemdegi eń tómen kórsetkishterdiń biri: tıisinshe 6,43 Mbıt/sek jáne 3,09 Mbıt/sek», - dep jazady Finprom.kz.

Analıtıkalyq portaldyń málimeti boıynsha, pandemııa kezinde sharalardyń bári onlaın formatqa kóship, bul segmentke úlken qysym túsirgen.

«Alaıda, jalpy qıyndyqtar aıasynda Qazastandaǵy mobıldi operatorlar qolda bar resýrsty saqtap qana qoımaı, baılanys sapasyn jaqsarta aldy. 2020 jyldyń qorytyndysy boıynsha utqyr keń jolaqty baılanys arqyly ınternet jelisine jalǵanǵan úı sharýashylyqtarynyń úlesi - 85,7%. Bul kórsetkish 2019 jyly - 84,9%, al 2015 jyly - 58,9% bolatyn», - delingen taldaýda.