Órt sóndirýdiń arnaıy algorıtmi ázirlendi – Mınıstr

<p>2027 jylǵa deıin eldegi tabıǵat qorǵaý jáne orman mekemeleri órtke qarsy 100% jaraqtandyrylady. Bul týraly Tótenshe jaǵdaılar mınıstri Syrym Sháriphanov aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Qaýipsizdik Keńesimen, Úkimet apparatymen jáne basqa da múddeli memlekettik organdarmen birlesip órtke den qoıý algorıtmi ázirlendi. Jahandyq jáne óńirlik aýqymdaǵy tótenshe jaǵdaılardy joıý jónindegi is-qımyl jospary, Azamattyq qorǵaý salasyndaǵy 2023-2027 jyldarǵa arnalǵan birinshi kezektegi sharalardyń keshendi jospary bekitildi. Onyń sheńberinde tabıǵat qorǵaý jáne orman mekemeleriniń jaraqtandyrylýy 100%-ǵa, TJM-95% - ǵa deıin materıaldyq-tehnıkalyq túrde nyǵaıtý josparlanyp otyr», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.

Sondaı-aq Ekologııa jáne tabıǵı resýrstar mınıstrligimen kelisim bekitildi. Oǵan sáıkes orman órtiniń týyndaǵany týraly alǵashqy habarlama boıynsha jaqyn mańdaǵy órt sóndirý bólimshesiniń kezekshi qaraýylyn jedel jóneltý qarastyrylǵan.

Orman órtterimen qatar mınıstrlik maýsymdyq tótenshe jaǵdaılardyń aldyn alýǵa da erekshe nazar aýdarady. Sý tasqynyna qarsy is-sharalardyń jol kartalaryn iske asyrý, sel, kóshkin jáne qar kóshkini qaýipsizdigin qamtamasyz etýdiń 2020-2024 jyldarǵa arnalǵan keshendi jospary tıimdiligin kórsetip jatyr.

«Maýsymdyq tótenshe jaǵdaılardyń týyndaý syn-qateri jyl saıyn Úkimettiń, tótenshe jaǵdaılardyń aldyn alý jáne joıý jónindegi vedomstvoaralyq memlekettik komıssııanyń, oblystyq jáne aýdandyq komıssııalardyń otyrystarynda qaralady. Praktıkalyq daǵdylar jyl saıynǵy oqýlar men komandalyq-shtabtyq jattyǵýlar aıasynda pysyqtalady», - dedi S.Sháriphanov.

Aıta keteıik, búgin azamattyq qorǵaý organdarynyń qurylǵanyna 28 jyl toldy. Elimizde 27 myńnan astam qutqarýshy jumys istep júr.