Órt sóndirýshilerge qosymsha jumys isteýge ruqsat berý kerek – depýtat
«Ótken aıda elimizdiń birneshe aımaǵyn órt sharpydy. Qostanaı oblysynda bolǵan iri órtte azamattyq jáne órtke qarsy qyzmettiń birneshe qyzmetkeri qurban boldy. Memleket basshysy Qostanaı oblysyna barǵan saparynda Tótenshe jaǵdaılar mınıstrligin aıtarlyqtaı nyǵaıtý qajettigin aıtty. Úkimetke TJ qyzmetkerleriniń áleýmettik máselelerin sheshýdi jáne olardyń kásibı daıarlyq deńgeıin arttyrýdy tapsyrdy», - dedi depýtat Májilistiń búgingi jalpy otyrysynda.
Depýtat tótenshe jaǵdaılar máselesi jóninde birqatar usynystaryn jarııalady.
«Eń aldymen, memlekettik órtke qarsy qyzmettiń sandyq shtatyn ulǵaıtý qajet. Ekinshiden, Belarýs Respýblıkasynyń úlgisi boıynsha Memlekettik órtke qarsy qyzmettiń qatardaǵy qyzmetkerlerine negizgi jumystan bos ýaqytynda ekinshi qosymsha jumysta eńbek etýge zańnamalyq quqyq berilsin. Qazirgi ýaqytta Qazaqstanda buǵan zań júzinde tyıym salynǵan. Úshinshiden, avtopark pen memlekettik órtke qarsy qyzmet ǵımarattaryn jedel jańartýdy júrgizýge mindetti – 30 jylda birde-bir jańa depo salynbaǵan aımaqtar bar. Sondaı-aq azamattyq qorǵanysty qorǵaý zattaryn jańartý, TJM qurylymdaryn arnaıy tehnıkamen jáne basqa da qajetti jabdyqtarmen tolyq kólemde qamtamasyz etý qajettigi bar», - dedi M. Magerramov.
Spıkerdiń aıtýynsha, polıtsııa jáne memlekettik órtke qarsy qyzmet qyzmetkerleriniń úlgisi boıynsha qutqarý qyzmetiniń qyzmetkerleri úshin zeınetke shyǵý jasyn tómendetý kerek.
«Qazirgi ýaqytta qutqarýshylar azamattyq qyzmetkerler retinde 63 jasqa tolǵannan keıin jalpy negizde zeınetke shyǵady. Bul jastaǵy qutqarýshylar bıiktikte, sý astynda, órtke qaýipti aımaqtarda naqty jumys túrlerin oryndaı almaıdy. Taý bókterindegi, orman jáne dala jerlerindegi órtke qarsy beketterdi san jaǵynan ulǵaıtyp, órtke qarsy baqylaý úshin drondarmen jabdyqtaý sekildi nyǵaıtý kerek. Órtke qarsy qyzmet mamanynyń qurylys kezinde, kóppáterli turǵyn úılerdi, ónerkásiptik jáne áleýmettik obektilerdi jáne olarda adamdardyń jappaı bolýyn kózdeıtin ózge de ǵımarattardy paıdalanýǵa qabyldaý kezinde jobalaý-smetalyq qujattama kezeńine mindetti túrde qatysýyn bekitken jón», - dedi depýtat.