«Órt sóndirýshiler ormanda as-sýsyz jumys istep júr» - TJD túsinik berdi

ÓSKEMEN. QazAqparat – «Shyǵys Qazaqstan oblysynda ormandaǵy jalynmen kúresip jatqan órt sóndirýshiler as-sýsyz júr» degen aqparat shyndyqqa sáıkes kelmeıdi. Bul týraly oblystyq Tótenshe jaǵdaılar departamentinen málim etti, dep habarlaıdy QazAqparat tilshisi.

Áleýmettik jelilerde Ulan aýdany Asýbulaq orman sharýashylyǵyndaǵy iri órtti aýyzdyqtaýǵa jumyldyrylǵan qutqarýshylardyń as-sýsyz qalyp, ash júrgenderi týraly aqparat tarady. Buǵan qatysty búgin ShQO Aqparat ortalyǵynda ótken baspasóz máslıhaty barysynda oblystyq TJD bastyǵynyń mindetin atqarýshy Dmıtrıı Tıtov túsinik berdi.

«Bul aqparat shyndyqqa sáıkes kelmeıdi. Jeke quram mindetti túrde úsh táýlikke jetetin azyq-túlikpen qamtylady. Al 3 kún ótip, azyq taýsylǵan kezde olardy tamaqtandyrýdy jergilikti atqarýshy organdar júzege asyrady. Ulan aýdanyndaǵy orman órtin sóndirýge qatysyp jatqan qutqarýshylar da dál osylaı azyq-túlikpen qamtamasyz etilgen», - dedi ol.

Sondaı-aq Dmıtrıı Tıtov jeke quramnyń qansha jalaqy alatynyn aıtyp berdi.

«Sońǵy eki jylda órt sóndirýshilerdiń eń tómengi jalaqysy 63 myńnan 130 myń teńgege deıin ósti. Al 20 jyldan astam ýaqyt eńbek etip kele jatqan órt sóndirý kóliginiń júrgizýshi 200 myń teńge alady», - dedi departament bastyǵynyń mindetin atqarýshy.

Esterińizge sala ketsek, osyǵan deıin ShQO-daǵy tabıǵı qoryqta shyqqan órttiń sóndirilgenin habarlaǵan edik.