Órt sóndirýshiler eskertedi: Terezeniń aldyna sý qoımańyz

PETROPAVL. QazAqparat – Terezeniń aldyna sý qoıýǵa bolmaıdy. Petropavl qalasy Tótenshe jaǵdaılar basqarmasynyń qyzmetkerleri osyndaı eskertý jasady, dep habarlaıdy QazAqparat.

Ótken jeksenbide Petropavlda erekshe oqıǵa bolǵan. Atap aıtqanda, 9 shilde saǵat 20:20-da 101 nomerine Sh. Ýálıhanov kóshesindegi 5 qabatty turǵyn úıdiń ekinshi qabatyndaǵy páterlerdiń biriniń balkonynda tútin kóringeni týraly aqparat túsedi. Páter qulyptaýly bolǵan, al eshqandaı órt belgileri kórinbeıdi. Anyqtalǵanyndaı, joǵary qabatta turatyn kórshileri tútindi baıqaǵan. Balkonnyń syrtyna bekitilgen gúl ósirýge arnalǵan aǵashtan jasalǵan qorap tutanǵan bolyp shyqty. Ol kúnniń ystyǵynan jana bastaǵan.

SQO TJD «Órt sóndirý jáne avarııalyq-qutqarý jumystary qyzmeti» MM №2 mamandandyrylǵan órt sóndirý bóliminiń qyzmetkerlerine balkonǵa avtosatymen kóterilip, órt kózin sóndirý úshin bir shelekke tolmaıtyn sý jetkilikti boldy. Mamandar órtke úıdiń joǵarǵy qabattarynan túsken temeki tuqylynyń sebep bolǵanyn anyqtady.

Osy oraıda, órt sóndirýshiler qaýipsizdikti eske salady:

- Balkonda eritkishterdi, boıaýlardy ustaý óte qaýipti.

- Balkondy qajetsiz zattarmen toltyrmaǵan durys.

- Ottyqty qaldyrmańyz, kún sáýlesinen qyzǵan kezde ol jarylyp ketýi múmkin.

- Balkonǵa, tereze aldyna sý qoımańyz, olar úlkeıtkish áınek sııaqty jaryq sáýlesin shoǵyrlandyrýy múmkin!

- Órt tutansa, dereý «101» telefon nomeri arqyly habarlaý kerek. Eger órt kúsheıip ketse, jel úrlep ketpeý úshin esikti jáne terezelerdi myqtap jaýyp, balkonnan dereý shyǵyńyz. Kórshilerge órt týraly eskertińiz.