Órt saldarynan 3 úı, 2 tehnıka órtendi – Nurlan Uranhaev

ASTANA. QazAqparat – Semeı ormany órtin sóndirýge ketip, iz-túzsiz joǵaldy delingen Sergeı Arhıpovtyń traktory tabyldy. Bul týraly Úkimet otyrysynda Abaı oblysynyń ákimi Nurlan Uranhaev aıtty, dep habarlaıdy QazAqparat tilshisi.

«Qazirgi ýaqytta órt saldarynan 3 úı, 2 tehnıka órtendi. Iis tıip ýlanǵan ormanshylyqtyń 2 qyzmetkeriniń jaǵdaıy jaqsarýda. Joǵalǵan traktorshy Arhıpovti izdeý jalǵasýda. Keshe traktory tabyldy. Polıtsııa qyzmetkerleri onyń ornalasqan jerin anyqtaý boıynsha jumys júrgizip jatyr», - dedi ákim.

Sonymen qatar ol Memleket basshysynyń tapsyrmasy boıynsha Ýspensk ormanshylyǵynyń qaza tapqan 14 jumysshysynyń otbasylaryna kómek kórsetilip jatqanyn aıtty.

«Búgingi tańda árbir otbasyna bıýdjetten jáne bıýdjetten tys qarajat aıasynda qajetti kómektiń derbes kartalary jasaldy. Sonymen qatar zardap shekkenderge kómek kórsetý jáne órt saldaryna joıý úshin «Aq Ertis» qaıyrymdylyq qorynda esepshot ashyldy. Barlyq tólemder ýaqytyly jáne tolyq kólemde kórsetiletin bolady. Apat jáne onyń saldaryn joıý jumystary baqylaýda», - dedi Nurlan Uranhaev.

Abaı oblysyndaǵy órt aımaǵynan joǵalyp ketken Sergeı Arhıpovtyń traktory tabylǵanyn buǵan deıin jazǵan bolatynbyz.