Órt saldarynan 17 adam qutqarylyp, evakýatsııalandy

QARAǴANDY. QazAqparat - 11 qańtarda Qaraǵandy qalasyndaǵy kóshelerdiń birinde órt shyqqany týraly habarlama tústi. Kóp qabatty turǵyn úıdiń 5-qabatyndaǵy páterde 3 sharshy metr alańda úı zattary, jıhaz janyp ketti, dep habarlaıdy QazAqparat.

TJD kúshteri órtti sátti joıyp, janyp jatqan páterden 1965 jyly týǵan 2 er adamdy qutqardy jáne jedel medıtsınalyq kómek brıgadasyna tapsyrdy. Aldyn ala aqparat boıynsha órttiń sebebi - ashyq ot kózi.

«Sondaı-aq, aǵymdaǵy jyldyń 11 qańtarynda Rýdnyı qalasynda 9 qabatty kóppáterli turǵyn úıde kenetten órt paıda boldy. Munyń bári birinshi qabattaǵy páterden bastaldy, onda 13 sharshy metr alańda jıhaz ben úı zattary órtene bastady.

Bes mınýttan keıin órt sóndirýshi-qutqarýshylar osy jerge kelip, 15 adam, onyń ishinde 4 balany kórshi páterler arqyly baspaldaqpen shuǵyl evakýatsııalady. Qaıtys bolǵandar men zardap shekkender joq», dep jazdy TJM baspasóz qyzmetinen.

Órt kúshter men quraldardyń qatysýymen sátti joıylǵan, jeke quramnyń 10 adamy jáne tehnıkasy jumyldyryldy.

TJM órttiń aldyn alý maqsatynda qaýipsizdik sharalaryn qatań saqtaýdy usynady:

- sóndirilmegen temeki men sirińke qaldyrmańyz!

- elektr symdary men aspaptardyń jaramdylyǵyn baqylańyz!

- bir jelige birneshe elektr aspaptaryn qosýǵa jol bermeńiz!

- balalardy eresekterdiń qaraýynsyz qaldyrmańyz jáne otpen oınaýyna jol bermeńiz!

- tek jumys isteıtin peshterdi, gaz jáne elektr qurylǵylaryn paıdalanyńyz!

- psıhıkalyq aýytqýshylyqtary bar, alkogolızmnen zardap shegetin jáne esirtki paıdalanatyn adamdarǵa erekshe nazar aýdaryńyz!

Oqıǵalar men tótenshe jaǵdaılardyń kez kelgen alǵysharttary men faktileri týraly 112 nemese 101 nómirine qońyraý shalyńyz.

Foto: gov.kz