Órt oshaǵyn anyqtaý úshin jasandy ıntellekt múmkindikterin paıdalaný qajet — Bektenov
«Býrabaı» ulttyq parkiniń aýmaǵynda engizilgen smart-júıeniń arqasynda sońǵy jyldary órt basqan alańdar aıtarlyqtaı qysqaryp, áreket etý jedeldigi artty. Bul tájirıbeni basqa da tabıǵı parkter men rezervattarda qoldaný kerek. Sondaı-aq órt oshaqtaryn ýaqtyly anyqtaý úshin jasandy ıntellekt múmkindikterin keńinen paıdalaný qajet. Osy máselelerdiń barlyǵy ortalyq jáne jergilikti memlekettik organdardyń keshendi sheshimin ári úılesimdi jumysyn talap etedi», — dedi ol.
Úkimet basshysy qazir órt qaýpi joǵary maýsymnyń naǵyz qyzǵan shaǵy ekendigine nazar aýdartty.
«Qazgıdromettiń derekterine sáıkes jazdyń sońyna deıin eldiń basym bóliginde órt qaýpi joǵary bolady. Ońtústik óńirlerde tamyz-qyrkúıek aılarynda aptap ystyq kútilýde. Bul — órtterdiń joǵary qaýip-qateri. Bıyldyń ózinde 161 orman órti tirkeldi. Órtterdiń sany aıtarlyqtaı tómendedi. Biraq soǵan qaramastan tilsiz jaýdyń tabıǵı oshaqtary kún saıyn tirkelýde. Máselen, Іle-Balqash rezervatynyń aýmaǵyndaǵy 2,5 myń gektar órtengen qamysty sóndirý jumystary 10 kúnge sozyldy. Jambyl oblysynyń Saryqopa jáne Lýgovoe orman sharýashylyqtarynda 1,8 gektar aýmaqty órt shaldy. Ýaqtyly júrgizilgen sharalardyń arqasynda bul órtter orman qoryna jaıylǵan joq jáne adamdar aman-esen», — dedi Premer-Mınıstr.
Osy rette Oljas Bektenov Tótenshe jaǵdaılar mınıstrligine Ekologııa mınıstrligimen jáne ákimdiktermen birlesip, osy baǵyttaǵy profılaktıkalyq jumysty kúsheıtýdi tapsyrdy.