Órt oqıǵalary Qaraǵandy oblysynda da jıiledi

QARAǴANDY. QazAqparat - Qaraǵandy oblysynda Shet aýdanynyń Taldy aýyldyq okrýgine qarasty taý jotasynyń aýmaǵynda tabıǵı órtti sóndirý jumystary júrip jatyr, dep habarlaıdy QazAqparat Qaraǵandy oblystyq Tótenshe jaǵdaılar departamentiniń baspasóz qyzmetine silteme jasap.

Baspasóz qyzmetiniń málimetterine qaraǵanda órt «Aqtoǵaı orman qorǵaý» KMM 4 oramyndaǵy orman shetine jaıylyp barady. Órtengen aýmaq aldyn ala málimet boıynsha 150 gektardy qurap otyr. Onyń 120-130 gektar aýmaǵy sóndirildi. 20-30 gektar aýmaqta órtti sóndirý jumystary júrip jatyr.

Órt bolyp jatqan jerde qýraǵan aǵashtar kóp, taýly jerler júristi qıyndatyp otyr, órt oshaqtarynyń bólshektenip jatýy men sý kózderiniń alystyǵy da kedergi. Órt bolyp jatqan jaqqa baratyn jol joq, jel de qubylyp tur. Osynyń barlyǵy jumysty qıyndatyp otyr.

Soǵan qaramastan órttiń jıekteri sóndirildi, ashyq janyp jatqan jer joq. Keı jerlerde ǵana tútin byqsyp jatyr.

Órtti sóndirýge «Qazavıaqutqarý» AQ-nyń sý tógý qurylǵysy bar tikushaǵy jumyldyryldy, ol órt oshaqtaryna kólemi 72 tonna bolatyn sýdy 24 ret tókti.

Órtti sóndirýge jalpy Tótenshe jaǵdaılar departamentinen, Aqtoǵaı orman jáne janýarlar dúnıesin qorǵaý sharýashylyǵynan, Qaraǵandy orman jáne janýarlar dúnıesin qorǵaý sharýashylyǵynan, erikti órt sóndirý bólimshelerinen jáne jergilikti atqarýshy organdardan barlyǵy 139 adam men 20 tehnıka jumyldyryldy.

Sonymen qatar, ótken táýlikte Qaraǵandy oblysynyń TJD men erikti órt sóndirý bólimsheleriniń kúshimen 3 dala órti sóndirildi.

Osakarov aýdanyna qarsty Ozernoe aýyldyq okrýginde Ozernoe aýylynan soltústik-batysqa qaraı 4 shaqyrym jerde 10 gektar aýmaqta qurǵaq shóp órtendi.

Buqar-Jyraý aýdanyndaǵy Kókpekti aýyldyq okrýginde Kókpekti aýylynan soltústik-shyǵysqa qaraı 5 shaqyrym jerde 5 gektar aýmaqta qurǵaq shóptiń jandy.

Buqar-Jyraý aýdany Botaqara aýyldyq okrýginde Botaqara aýylynan soltústik-batysqa qaraı 15 km jerde 5 gektar aýmaqta qurǵaq shóp órtendi.

«Qaraǵandy oblysynyń TJD órt qaýipsizdigi sharalaryn qatań saqtaýǵa shaqyrady. Órt qaýipti kezeńde qurǵaq shópter men qoqystardy ashyq jerde, ǵımarattardyń janynda jaǵýǵa, qalyń toǵaılarda, aǵashtardyń túbinde ot jaǵýǵa, dalada qurǵaq shópterdi jaǵýǵa tyıym salynady. Sóndirilmegen sirińke men temekini tastamańyzdar. Otpen abaı bolyńyzdar!»,-delingen óńirlik TJD eskertýinde.