Órt qaýpi kezeńine daıyn emes eldi mekenderge 2 myńnan astam eskertý berildi

ASTANA. QazAqparat – Eldi mekenderdiń órt qaýipi kezeńge ázir emestigi týraly eki myńnan astam eskertý berildi. Bul týraly Úkimet otyrysynda Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

«Aǵymdaǵy jaǵdaıdy eskere otyryp, barlyq múddeli ortalyq jáne jergilikti atqarýshy organdar eldiń orman jáne dala alqaptarynda joǵary táýekelge ázir bolýy qajet. Taldaý kórsetkendeı, tabıǵı órttiń shamamen 40 paıyzy tabıǵı qubylystardan bolady. Al 50 paıyzdan astamy - adam áreketiniń nátıjesi. Osyǵan baılanysty TJM, polıtsııa jáne ákimdikter aldynda halyqtyń jáne aýyl sharýashylyǵy uıymdarynyń órt qaýipsizdigi talaptaryn saqtaýyn baqylaýdy kúsheıtý máselesi birinshi kezekte tur», - dedi birinshi vıtse-mınıstr.

Onyń atap ótýinshe, azamattarǵa órt qaýipsizdigi erejelerin buzbaý jáne jaýapkershilik is-sharalaryn saqtaý qajettigi jaıynda keń aýqymdy túsindirý jumystaryn júrgizý qajet.

«Qazirgi ýaqytta TJM aýmaqtyq bólimsheleri barlyq eldi mekende aýdan jáne aýyl ákimderiniń órtke qarsy is-sharalardy oryndaǵany týraly oblys ákimdikterin habardar ete otyryp, tekserý júrgizip jatyr. Eldi mekenderdiń órt qaýipi kezeńge ázir emestigi týraly eki myńnan astam eskertý berildi», - dedi ol.