Órt qaýipsizdigi: Jańa jol kartasy ázirlenip, gaz-tehnıkalyq ınspektsııalar qurylady
Vedomstvo málimetinshe, eldegi bolǵan alatyn tótenshe jaǵdaılardyń 92 paıyzy órtke qatysty.
«Jylý berý kezeńinde jaǵdaı ýshyǵyp ketedi. Pandemııany eskere otyryp, bıyl jylý berý maýsymy ádettegiden erte bastaldy. Qyrkúıekten bastap turǵyn úı sektorynda 1 300-den astam órt oqıǵasy boldy», - dedi mınıstr.
Órt jaǵdaıynyń ósýi sebepteri qaýipsizdik talaptaryn oryndamaý saldarynan, ıaǵnı turmystyq qurylǵy men peshti paıdalaný kezinde oryn alyp otyr.
«Byltyrǵy tájirıbeniń negizinde turǵyn úı sektorynda josparly túrde jumystar júrgizilýde. Jylý berý maýsymy bastalǵanǵa deıin 15 tamyzdan bastap tıisti sharalar atqaryldy. Osy oraıda halyq arasyndaǵy áleýmettik osal toptardaǵy 118 myńnan astam turǵyn úıi esepke alyndy. Óńirlik ákimdikter, ishki ister organdary, áleýmettik qamtý, bilim berý jáne densaýlyq saqtaý ókilderimen birlesip 87 myńnan astam úıdi (74 paıyzy) aralap tekserý júrgizildi. Onyń ishinde 9 paıyzǵa jýyǵy (10 myńnan astam úı) órt qaýipsizdigi qaǵıdasyn buza otyryp paıdalanylýda, olar jergilikti atqarýshy organ baqylaýyna alyndy», - dedi ıÝ. Ilın.
Belgili bolǵandaı, jylytý maýsymyna daıyndyqty eskere otyryp, 417 jylý energııasymen qamtamasyz etý jáne 4 322 bilim berý nysanyna tekserý júrgizildi. Onyń ishinde 47 jylý-elektr ortalyǵy jáne 565 oqý orny ereje buzý jaǵdaıynda paıdalanylýda. Osy oraıda ol tıisti aqparat ýákiletti organdar men ákimdikterge joldanǵan.
«Pandemııaǵa baılanysty densaýlyq saqtaý nysandary erekshe baqylaýǵa alyndy, 1 409 nysan esepte tur. Qarasha aıynyń sońyna deıin tekserý sharalary boıynsha aqparat Úkimetke usynylady», - dedi ıÝrıı Ilın.
Jalpy sıpattaǵy júıeli problemalar
Qazirgi kezde órt sóndirý bólimderiniń eldi mekenderden qashyqta ornalasýy problemaǵa aınalǵan. Qysqy kezeńde jeke turǵyn úıde órttiń shyǵý qaýip-qateri artady, aýa raıy jaǵdaılary (kóktaıǵaq, joldy qar basý, boran jáne t.b.) kúrdelenedi, bul órt sóndirý toptarynyń kelýi ýaqytyna áser etedi.
Vedomstvo aqparatyna qaraǵanda, órt qaýipsizdigine qoıylatyn jalpy talaptarǵa áıkes, birinshi órt bólimshesiniń shaqyrý ornyna kelýiniń normatıvtik ýaqyty qalalarda - 10 mınýtty, aýyldyq jerlerde - 20 mınýtty quraıdy. Bul rette qazirgi kezde qalalarda atalǵan is-qımyldar ýaqyty shamamen 11 mınýtty, aýyldyq aýdandarda 30 mınýt jáne odan da kóp ýaqytty qamtyp tur. Respýblıka boıynsha TJM-niń 413 órt sóndirý bólimi bar. Olar jyl saıyn orta eseppen órt sharpyǵan nysandardaǵy 40 myńǵa jýyq shaqyrtýǵa barady. Órt sóndirý toptarynyń ýaqtyly kelýin qamtamasyz etý úshin 122 órt sóndirý deposy qajet.
«Óńirlerdiń ákimdikterimen birlesip, bizdiń bólimshelerimiz joq eldi mekenderde órt sóndirý beketterin qurý arqyly máseleni sheshýge tyrysyp jatyrmyz. Úsh jylda 153 beket jasaqtaldy. Qazirgi kezde elimiz boıynsha barlyǵy 396 beket qyzmet etýde, bul jalpy halyq sany bir mıllıonnan (1,2 mln) astam 1 200 (1 189) aýyl men kenttiń qorǵalýyn qamtamasyz etti. Sonymen qatar, sońǵy úsh jylda josparly kórsetkishter 60 paıyzdan aspaıdy. Óńirlerdiń ákimderine órt sóndirý beketteriniń tıimdi geografııalyq ornalasýyn eskere otyryp, olardy qurýdy qamtamasyz etý talap etiledi», - dedi ıÝ. Ilın.
Budan bólek, elimiz boıynsha 15 myńnan astam órt gıdranty jaramsyz kúıde tur. Bıyl ákimdikter eki myńnan astamyn (2 689) jóndedi. Alaıda jyl saıyn sýmen jabdyqtaý júıesiniń tozýyna baılanysty shamamen bir myńy esepten shyǵady.
Mamandardyń atap ótýinshe, qurylys barysynda nysandar arasyndaǵy belgilengen alshaqtyq saqtalmaıdy, órt tehnıkasynyń ótýi úshin kireberister eskerilmeıdi. Kóbinese qurylys kezinde jobalardan aýytqýǵa jol beriledi, nátıjesinde nysandar ózgertilmeıtin kemshiliktermen paıdalanylady.
«Jalpy respýblıka boıynsha óreskel ereje buzý jaǵdaıynda 263 iri nysan paıdalanylýda. Lıtsenzııadan aıyrýǵa deıin tıisti sharalar qabyldaý úshin aqparat ýákiletti organǵa joldandy. Bıyldan bastap Indýstrııa jáne ınfraqurylymdyq damý mınıstrligimen birlesip jobalaý satysynda normalardy saqtaý máselesi sheshildi, órt qaýipsizdigi boıynsha sarapshylar engizildi. Sonymen qatar, qurylys kezinde tehnıkalyq jáne avtorlyq qadaǵalaý qyzmetine baqylaýdy kúsheıtý qajet», - dedi ıÝ. Ilın.
Sóz sońynda mınıstr óńirlerde órt sóndirý tehnıkasyn jańartýdy surady. Eldi mekenderdi qorǵaýdy qamtamasyz etýdiń mańyzdy quramdas bóligi TJM bólimsheleriniń tehnıkalyq ázirligine baılanysty ekeni anyq. 2018-2020 jyldarǵa arnalǵan tıisti jol kartasyn iske asyrý jaraqtandyrý deńgeıin 40-tan 52 paıyzǵa deıin jetkizýge múmkindik berdi.
«Qol jetkizilgen kórsetkishterge qaramastan, jyl saıynǵy esepten shyǵarýǵa jatatyn eski órt tehnıkasy parkin jańartý talap etiledi. Osyǵan baılanysty, Qarjy mınıstrligimen jáne ákimdiktermen birlesip, aldaǵy úsh jylǵy kezeńge (2021-2023 jyldar) arnalǵan jol kartasyn ázirleý júrgizilýde», - dedi vedomstvo basshysy.
Turǵyn úı sektorynda reıdter júrgiziledi
Búgin Úkimet otyrysynda Premer-Mınıstr Asqar Mamın jylytý maýsymy kezindegi órt qaýipsizdigi sharalaryna qatysty tapsyrmalar berdi.
«Tótenshe jaǵdaılar mınıstrligi órttiń aldyn alý, kúshter men quraldardyń órtti jedel sóndirýge daıyndyǵy máselesin naqty úılestirýdi qamtamasyz etsin. Órt qaýipsizdigi erejelerin buzýshylyqty anyqtaý jáne ásirese, turǵyn úıler men koǵamdyq jerlerde órt qaýipsizdigin qamtamasyz etýdi baqylaý boıynsha jumysty jalǵastyrý kerek. Іshki ister mınıstrligimen turǵyn úı sektorynda tıisti reıdter júrgizsin», - dedi Úkimet basshysy.
Sonymen qatar, ákimdikterge áleýmettik jáne kommýnaldyq ınfraqurylym nysandarynyń órt qaýipsizdigin qamtamasyz etý júkteldi.
«Áleýmettik saladaǵy nysandarda ornalasqan qazandyqtardyń jumysyn erekshe baqylaýǵa alyp, olardy ǵımarattan shyǵarý máselesin jyldamdatyp sheshý kerek. Órtke qarsy qyzmet bólimsheleri joq eldi mekenderde órt beketterin qurý jumystaryn jalǵastyrý qajet», - dedi A. Mamın.
Munymen qosa, jaýapty mınıstrlikke eldi mekender men nysandarda órtke qarsy ınfraqurylymdy damytý jáne órt qaýipsizidigin qamtamasyz etý jumysyn jalǵastyrý tapsyryldy.
«Osyǵan oraı, mınıstrlikke múddeli memlekettik organdarmen birlesip, 2021 jyldan bastap kelesi úsh jyldyq kezeńge arnalǵan Materıaldyq-tehnıkalyq jaraqtandyrý týraly jańa jol kartasyn ázirlep, bekitýdi tapsyramyn», - dedi Premer-Mınıstr.
Aıta keteıik, «Gaz jáne gazben jabdyqtaý týraly» zańǵa sáıkes ákimdikter gaz-tehnıkalyq ınspektsııa quryp, búkil gaz jabdyǵyn tekserip turýy kerek. Alaıda bul jumys elordada, Almatyda, Aqmola oblysy men Qostanaı oblysynda ǵana atqaryldy.
«Basqa barlyq óńirlerdiń ákimdikterine bir aı ishinde gaz-tehnıkalyq ınspektsııa quryp, tıisti baqylaýdy qamtamasyz etýdi tapsyramyn», - dedi Premer-Mınıstr.