Órt aldynda «Semeı ormany» aýmaǵyndaǵy kamera nelikten óshkeni anyqtaldy

<p>ASTANA. KAZINFORM &mdash; Búgin Parlament Májilisinde ormandy qorǵaý taqyrybyna arnalǵan Úkimet saǵatynda &laquo;Semeı ormany&raquo; aýmaǵynda zańsyz aǵash kesý derekterin tekserýge qatysty túsinik berildi.</p>

Májilis depýtaty Erbolat Satybaldın «Semeı ormany» rezervatynda órt kezinde beınebaqylaý júıesiniń isten shyǵýy derekteri týraly surady. Sonymen qatar depýtat aǵashty zańsyz kesý áreketteri jaıynda suraq qoıdy.

Óz kezeginde Bas prokýratýranyń Sotqa deıingi tergep-tekserý qyzmetiniń basshysy Dáýlet Aqylbekov tıisti faktiler tekserilgenin aıtty.

«Naızaǵaıdyń baǵytyn anyqtaıtyn kameranyń óshirilgeni anyqtaldy. „Semeı ormany“ mekemesiniń qyzmetkeri 2023 jyldyń 7 maýsymyna deıin akkýmýlıatordy aýystyrý jumystaryn atqaryp, naızaǵaıdy baqylaıtyn quraldy jeliden ajyratqan. Alaıda keıinnen ony qosýdy umytyp ketken», — dedi D. Aqylbekov.

Onyń aıtýynsha, júıeniń ózi qaýip tóngeni týraly belgi bermeıdi. Qurylǵyda tútin men shańǵa áreket etetin fotokamera bar.

«Budan bólek, orman sharýashylyǵyndaǵy urlyq, zańsyz aǵash kesý faktileri boıynsha barlyq qylmystyq isterdi qaıta qaradyq. Bul rette, jergilikti turǵyndar men „Semeı ormany“ qyzmetkerlerinen jaýap alyndy. Zańsyz aǵash kesý boıynsha 20-ǵa jýyq derek anyqtaldy. Polıtsııa departamentine tekserý júrgizý tapsyryldy. Qazir tergeý jalǵasyp jatyr», — dedi ol.

Eske salaıyq, byltyr 8 maýsym kúni Abaı oblysynyń «Semeı ormany» rezervatynda iri órt tutandy. 60 myń gektardan astam orman órtendi.

Saldarynan 14 ormanshy qaza bolǵan.