Ornyqty damý demokratııa negizinde ishki saıası turaqtylyqty kórsetedi, biraq ony syrttan izdemeı, eldiń mádenı dástúrinen eskerý mańyzdy - Q.Toqaev

ALMATY. QazAqparat - Búgin ál-Farabı atyndaǵy QazUÝ-da QR Parlamenti Senatynyń tóraǵasy Qasym-Jomart Toqaevtyń qatysýymen «Turaqty adamı damýdyń jańa paradıgmasy. G-Global - jahandyq dıalog formaty» atty halyqaralyq konferentsııa ótip jatyr.

Senat tóraǵasy qatysýshylarǵa memleket basshysy Nursultan Nazarbaevtyń quttyqtaý sózin oqyp berdi.

Memleket basshysy úndeýinde G-Global jobasy aımaqtyq jáne halyqaralyq aýqymda tabysty júzege asyrylyp jatqany, daryndy jas adamdardyń jáne qoǵamdyq uıymdar men bıznes qurylymdardyń qýatty ıntellektýaldyq áleýetine ıe ekendigi atap ótildi.

Jıynnyń mańyzdylyǵyn ataı kele, Q.Toqaev jańa paradıgmanyń 10 tujyrymyn usyndy. Atap aıtqanda, ornyqty damýdyń jańa paradıgmasynda ekonomıkalyq, ekologııalyq máselelerdi qaıta qaraý, adam kapıtalynyń damýyna basymdyq berilmek.

«Jańa tujyrymdama terrorızm men ekstremızmniń jolyn qalaı kesý kerek, álemdik saıasattaǵy janjaldardy azaıtý suraqtaryna jaýap berý kerek. Ornyqty damý demokratııa negizinde ishki saıası turaqtylyqty kórsetedi, biraq ony syrttan izdemeı, tarıhı tájirıbeni eldiń mádenı dástúrlerin eskerý mańyzdy», - dedi Senat tóraǵasy. Q.Toqaev adamzat aldynda jańa dáýirde týyndaǵan syn-qaterlermen kúreste Qazaqstannyń ustanymyn jan-jaqty ashyp berdi.

«Qazaqstan qyrǵı-qabaq soǵystyń taptaýryn kózqarastaryn eńsere otyryp, ózara senimdi jahandyq is-qımyldy nyǵaıtý arqyly álemdik ekonomıkany daǵdarystar men retsessııanyń shyrmaýynan shyǵarýǵa bolady degen kózqarasty ustanady»,- dedi Senat tóraǵasy