Ormanshy mártebesin kóterý máselesi qaralyp jatyr - Maǵzum Myrzaǵalıev

NUR-SULTAN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev orman sharýashylyǵy qyzmetkerlerin kásibı merekesimen quttyqtady. Jyl saıyn qazan aıynyń úshinshi jeksenbisinde atap ótiletin kún bıyl 18 qazanǵa týra kelip otyr, dep habarlaıdy QazAqparat tilshisi.

«Qıyndyǵy men san-túrli táýekelderine qaramastan, elimizdiń orman qoryn saqtap, jańǵyrtý tabandy eńbek etip kele jatqan azamattar qandaı qurmetke de laıyq. Sebebi orman kesheni - ekologııalyq qaýipsizdiktiń kepili»,- dep jazdy ol Twitter paraqshasynda.

Mınıstr qazir ormanshylar mártebesin kóterý máselesi qaralyp jatqanynan habardar etti.

«Ormanshylar - baǵa jetpes ulttyq baılyǵymyzdy qorǵap, keler urpaqqa jetkizýshiler. Olardyń zor eńbegin eskere otyryp, bizdiń mınıstrlik ormanshylar statýsyn kóterý máselesin qarastyryp jatyr. Jasyl tabıǵatty aıalaý - árqaısymyzdyń mindetimiz. Sondyqtan barlyq el azamattaryn orman qoryna uqypty qarap, ony qorǵaýshylarǵa qoldaý kórsetýge, jumystaryn baǵalaýǵa shaqyramyn»,- dedi Maǵzum Myrzaǵalıev.

Eske salaıyq, orman sharýashylyǵy qyzmetkerleriniń kásibı merekesi 2017 jyly QR Úkimeti qaýlysymen bekitilgen.