Ormandaǵy órt: Qyzmetine salǵyrt qaraǵan sheneýnikter qylmystyq jaýapqa tartylmaq

ASTANA. QazAqparat – Abaı oblysyndaǵy orman órti boıynsha óz qyzmetine salǵyrt qaraǵan laýazym ıeleri qylmystyq jazaǵa tartylady. Bul týraly QR Bas prokýrorynyń orynbasary Jandos Ómirálıev aıtty, dep habarlaıdy QazAqparat tilshisi.

«Abaı oblysyndaǵy aýqymdy órtke qatysty Qylmystyq kodekstiń 292-baby 3 bóligi boıynsha is qozǵaldy. Memleket basshysynyń tikeleı tapsyrmasy aıasynda atalǵan istiń tergelýi Bas prokýratýraǵa júkteldi. Osy oraıda quqyq qorǵaý organdarynyń bilikti tergeýshileri men jedel ýákilderdi jumyldyra otyryp, tıisti tergeý toby quryldy. Qazir tergeý toby Abaı oblysyndaǵy apat aýmaǵynda jumysyn bastap ketti», - dedi J. Ómirálıev.

Onyń aıtýynsha, atalǵan qylmystyq isti Bas prokýror óz baqylaýyna aldy.

«Órttiń saldaryn, qorshaǵan ortaǵa keltirilgen zalaldy, 14 adamnyń óz qyzmettik boryshyn óteý barysynda qaza bolýyn eskere otyryp, taǵy bir qylmystyq is qozǵaldy. Qyzmetine salǵyrt qaraý baby boıynsha óz qyzmetin tıisti deńgeıde atqarmaǵan, aýyr zardapqa jol bergen barlyq laýazym ıeleri qylmystyq jaýapqa tartylady», - dedi Bas prokýratýra ókili.