Orman sharýashylyǵy mekemeleriniń basshylaryn attestatsııalaý kerek - Myrzaǵalıev

NUR-SULTAN. QazAqparat - Orman sharýashylyǵy mekemeleriniń birinshi basshylaryn attestatsııalaýdan ótkizý kerek. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev vedomstvonyń keńeıtilgen alqa otyrysynda aıtty, dep habarlaıdy QazAqparat tilshisi.

«Ókinishke oraı, brakonerlik faktileriniń jıileýi saldarynan úsh ınspektor qaza boldy. Zańsyz aǵash kesý de toqtamaı tur. Osyǵan baılanysty Erlan Nuralyuly men Orman sharýashylyǵy jáne janýarlar dúnıesi komıtetiniń tóraǵasy Ashat Qaınarbekovke «Ohotzooprom» ınspektorlyq quramy úshin brakonerlikpen kúres boıynsha arnaıy teorııalyq jáne praktıkalyq oqý-jattyǵý ótkizýdi jalǵastyrýdy, «Ósimdikter dúnıesi týraly» zań jobasyn ázirleýdi jáne qoǵamnyń jáne múddeli uıymdardyń qatysýymen belsendi talqylaýdy qamtamasyz etýdi ári osy jyldyń sońyna deıin Parlament Májilisine engizýdi tapsyramyn», - dedi mınıstr orynbasary Nysanbaevqa qarata.

Sonymen Maǵzum Myrzaǵalıev óńir ákimdikterimen birlesip ormandardy shabýǵa jáne orman órtteriniń úlken alańdarǵa taralýyna jol bermeý, tabıǵat qorǵaý mekemelerin tehnıkalyq jabdyqtaý jóninde qosymsha sharalar qabyldaý qajettigin atap ótti. Ol satyly josparlarda kózdelgen kólemderge sáıkes ormandardy molyqtyrýdy júzege asyrý mindet ekendigin basa aıtty.

«Qurmetti ákimderdiń orynbasarlary, vıtse-mınıstr Erlan Nuralyuly atap ótkendeı, orman sharýashylyǵy mekemeleriniń birinshi basshylary kadrlyq quramynyń 20 paıyzy qoldanystaǵy biliktilik talaptaryna sáıkes kelmeıdi. Osyǵan baılanysty, memlekettik orman sharýashylyǵy mekemeleriniń birinshi basshylaryn attestatsııalaýdan ótkizýdi uıymdastyrýdy suraımyn», - dedi ol.