Orman sharýashylyǵy mamandarynyń jalaqysyn ósirýde bólip-jarmaý kerek - depýtat

ASTANA. QazAqparat – Orman sharýashylyǵyndaǵy qyzmetkerlerdi bólip-jarmaı, mamandardyń báriniń aılyǵyn dereý 100 paıyzǵa kóterý kerek. Bul usynysty Májilistiń jalpy otyrysynda depýtat Nartaı Sársenǵalıev aıtty, dep habarlaıdy QazAqparat tilshisi.

«Abaı oblysynda orman órti bolyp, ondaǵan azamatymyzdan aırylǵan soń, Ekologııa mınıstri «ormanshylardyń jalaqysy osy jyldyń 1 shildesinen bastap ósedi» dep aqparat quraldarynan aqtarylyp sóıledi. Kún saıyn ómirlerin bolmashy jalaqy úshin báıgege tigip júrgen mamandar qýandy. Biraq qýanyshtary uzaqqa barmady. Sebebi, Úkimet bul saladaǵy qyzmetkerlerdiń teń jartysyn «umytyp ketken». Atap aıtqanda, 1 shildeden bastap jalaqysy óskenderdiń sanatyna «Orman jáne janýarlar dúnıesin qorǵaý jónindegi» mekemelerdiń dırektory, dırektordyń orynbasary, orman órtin sóndirý stantsııasynyń basshysy, ańtanýshy, ormanshylyq basshylary syndy birqatar maman kirgen. Biraq osy mekemedegi órt sóndirý stantsııasynyń sarbazdary, traktor júrgizýshi, avtokólik júrgizýshi, órt sóndirý avtokóliginiń júrgizýshisi, tuqymbaq jumysshylary, radıo baılanys operatory, avtokólik jóndeýshi, kishi qyzmetker, bas esepshi, ekonomıst, esepshi-kassır, zańger, mehanık, sharýashylyq meńgerýshisi, kadr mamany, is júrgizýshi laýazymdaryndaǵy qyzmetkerlerdiń aılyǵyna kók tıyn da qosylmaı qaldy. Úkimet taǵy bireýdi umytyp ketpesin dep, ádeıi búkil qyzmettiń ataýyn tizim shyqtym», - dedi N. Sársenǵalıev Úkimet basshysynyń birinshi orynbasary Roman Sklıardyń atyna joldaǵan saýalynda.

Onyń aıtýynsha, BQO-daǵy orman sharýashylyǵynda qyzmet etetin órt sóndirýshiler 70 myń teńge aılyq alady. Almaty oblysyndaǵy ormanshylarda da osy jaǵdaı.

«Bizdiń depýtattarǵa kelgen hatty Ekologııa mınıstrine jiberip edim, syrǵytpa jaýap keldi. Onda «jalaqysy óspegen mamandarǵa jergilikti bıýdjetten qarjy qarastyrylsyn» degen. Biraq jergilikti bıýdjette atalǵan maqsatqa qarjy qaralmaǵan. Ekinshiden, orman sharýashylyǵyndaǵy tehnıkalar ábden tozǵan. Traktorlar júrmeıdi, kólikter baıaǵyda temir-tersekke aınalǵan. Bul eldegi búkil ormanshylardyń aryzy dep qaraý kerek, óıtkeni keremet jasaqtalǵan biri joq», - dedi depýtat.

Onyń paıymynsha, orman sharýalyǵyndaǵy qyzmetkerlerdi bólip-jarmaı, elimiz boıynsha «Orman jáne janýarlar dúnıesin qorǵaý jónindegi» mekemelerde qyzmet etetin mamandardyń báriniń aılyǵyn dereý 100 paıyzǵa kóterý kerek.