Orman sharýashylyqtaryn jabdyqtaý úshin 68 mlrd teńgege keshendi jospar ázirlendi

<p>ASTANA. KAZINFORM &ndash; Úkimet 2023-2027 jyldary Orman sharýashylyǵy mekemeleriniń materıaldyq-tehnıkalyq jaraqtandyrylýyn nyǵaıtý boıynsha jalpy somasy 68 mlrd teńgeden asatyn Keshendi jospar qabyldady. Bul týraly Ekologııa jáne tabıǵı resýrstar mınıstri Erlan Nysanbaev aıtyp berdi.</p>

«Ótken jyly mınıstrliktiń tabıǵat qorǵaý uıymdary úshin shamamen 9 mlrd teńgege 25 órt sóndirý avtokóligi, 51 shaǵyn órt sóndirý kesheni, 154 traktor, 73 patrýldik avtokóligi jáne 655 órtke qarsy jabdyqtar satyp alyndy. Ákimdikter 6,6 mlrd teńgege 20 órt sóndirý avtokóligin, 127 traktor men 76 patrýldik avtokólikti satyp aldy. Buǵan deıin orman sharýashylyǵyn materıaldyq-tehnıkalyq jaraqtandyrýǵa mundaı qarjy kólemi bólinbegen», - dedi E. Nysanbaev Úkimet otyrysynda.

Mınıstrdiń aıtýynsha, memlekettik orman ıelenýshileri jańa tehnıkany satyp alýyna qaramastan qolda bar tehnıkanyń tozý protsenti joǵary.

Máselen, órt sóndirý mashınalary boıynsha 72%, traktorlar boıynsha – 50% jáne patrýldik avtokólikter boıynsha – 55% tozý baıqalady.

«Bıyl Keshendi jospar aıasynda materıaldyq-tehnıkalyq jaraqtandyrý jumystary jalǵasady. Bul maqsattarǵa jergilikti bıýdjetten 3,8 mıllıard teńge, mınıstrliktiń tabıǵatty qorǵaý mekemeleri úshin 15,4 mıllıard teńge bólindi», - dedi Ekologııa mınıstri.

Aıta keteıik, ótken jyly 116 myń gektardan astam orman qory órtenip ketti. Bıyl da aptap ystyq pen qurǵaqshylyq boljanyp otyr.