Orman órtiniń kóbeıýine klımattyń ózgerýi áser etip otyr – Erlan Nysanbaev

<p>ASTANA. KAZINFORM &mdash; Byltyr 800-den astam orman órti tirkeldi. Bul týraly Parlament Májilisinde ormandy qorǵaý taqyrybyna arnalǵan Úkimet saǵatynda QR Ekologııa jáne tabıǵı resýrstar mınıstri Erlan Nysanbaev aıtty.</p>

«Memlekettik orman qorynyń aýdany 30,9 mln gektar, onyń ishinde ormanmen kómkerilgen jer - 13,7 mln gektar. El aýmaǵynda ormandy alqap 5 paıyzdy qurady. 2023 jyly jalpy aýdany 116,8 myń gektardy qamtyǵan 810 orman órti tirkeldi, onyń ishinde naqty ormandy alań 61,1 myń gektar», - dedi E. Nysanbaev.

Onyń aıtýynsha, ormanda qyzyl jalynnyń jaıylýyna naızaǵaı túsý (498), aýyl sharýashylyǵy jerlerinen kelgen órt áser etken (87), sondaı-aq anyqtalmaǵan sebepterden 194 oqıǵa tirkelgen. Jeke jáne zańdy tulǵalardyń kinásinen órt shyǵýynyń 30 deregi anyqtaldy.

«Keıingi jyldary orman órtiniń kóbeıip ketýi dúnıejúzilik klımattyń ózgerýine tikeleı baılanysty ekenin atap ótemiz. Bul rette, basqa jerge qaraǵanda Azııa kontınentinde klımat +4 gradýsqa jyldam kóterilip jatyr. Bul qubylys byltyr jeltoqsanda Dýbaıda ótken klımattyń ózgerýi jónindegi konferentsııada aıtyldy», - dedi mınıstr.

Budan buryn habarlanǵandaı, Abaı oblysynda órtengen aǵashty óńdeý zaýyty salynady.