Orman órtine qatysty kezekti feık taraýda

SEMEI. QazAqparat – Orman aǵashtaryn tutandyrý úshin daıyndalǵan tamyzyqtar týraly ınternet jelisinde taraǵan vıdeoǵa Abaı oblysynyń ákimdigi túsinik berdi, dep habarlaıdy QazAqparat.

«Internet jelisinde vıdeo tarap jatyr, onda adamdar toby ormanda aǵashtarǵa ot qoıý úshin tamyzyqtar daıyndalǵanyn aıtady. Olardyń biri Jabyq aýylynyń ataýyn ataıdy. Aqparattarǵa súıensek, 2021 jyldyń maýsym aıynda Reseı Federatsııasy Chelıabi oblysynyń Jabyq aýylynda orman alqabynda iri órt boldy. Bul, vıdeorolıktiń Abaı oblysyna esh qatysy joqtyǵyn aıǵaqtaıdy», - delingen ákimdik habarlamasynda.

Óńir ákimdigi sondaı-aq tek resmı aqparat kózderine senýge shaqyrdy.

Buǵan deıin Semeı ormanyndaǵy órt Úlbi GES-ine jaqyndaǵany týraly aqparat joqqa shyǵarylǵan edi.