Orman órtin sóndiretin stansa qyzmetkerleriniń mártebesi kóteriledi

ASTANA. QazAqparat – Orman órt sóndirý stansasy qyzmetkerleriniń mártebesi memlekettik orman kúzetiniń jumyskerlerimen teńestiriledi, dep habarlaıdy QazAqparat tilshisi.

Ashyq NQA portalynda jarııalanǵan jańa buıyryq negizinde endi myna sanattaǵy jumyskerler memlekettik orman kúzetiniń qyzmetkerlerine teńestiriledi:

- orman sharýashylyǵy salasyndaǵy ýákiletti organ vedomstvosynyń júıesine enetin, orman qoryn kúzetý, qorǵaý, paıdalaný, ormandardy molaıtý jáne orman ósirý máselelerimen aınalysatyn mamandandyrylǵan vedomstvolyq baǵynysty uıymdardyń qyzmetkerleri;

- Memlekettik orman ıelenýshileriniń orman órt sóndirý stantsııalarynyń órtke qarsy qyzmetiniń jumyskerleri.

«Túzetý tabıǵat qorǵaý mekemeleri órtke qarsy qyzmetiniń qyzmetkerlerin (orman órt sóndirý stantsııalarynyń bastyqtary, órt sóndirý mashınalarynyń júrgizýshileri, traktorshy-mashınıster, radıooperatorlar, órt sóndirý mashınalaryn, jabdyqtar men apparatýralardy jóndeý jónindegi slesarlar, orman órt sóndirýshileri, órt sóndirý-baqylaý munarasynyń baqylaýshylary) memlekettik orman kúzetiniń qyzmetkerlerine teńestirý jáne olardy jaǵdaılaryn jáne eńbekaqy mólsherin jaqsartý úshin shtattan tys jumysshylar sanatynan shyǵaryp, shtatqa alý. Bul shara atalǵan qyzmetkerlerdiń tabıǵat qorǵaý mekemeleriniń shtatyna kirmeıtindigine baılanysty talap etiledi. Bul rette olar densaýlyq pen ómirge zııan keltirý qaýpimen baılanysty orman órtteriniń aldyn alý jáne joıý jónindegi jumystarǵa turaqty negizde tartylady», - delingen Ekologııa jáne tabıǵı resýrstar mınıstriniń buıryq jobasynda.

Qujat 8 qyrkúıekke deıin kópshilik talqysynda bolady.

Aıta ketsek, qyrkúıekten bastap tabıǵat qorǵaý ınspektorlaryna qosymsha aqy tólenedi.