Orman órti: Semeı qalasynda tótenshe jaǵdaı rejımi jarııalandy

SEMEI. QazAqparat – Semeıde orman órtine baılanysty tótenshe jaǵdaı jarııalandy. QazAqparat bul týraly Abaı oblysy ákimdiginiń baspasóz qyzmetine silteme jasap habarlaıdy.

«Semeı ormany» memlekettik orman tabıǵı rezervaty aýmaǵynda (Batpaev orman sharýashyly 66, 67, 55, jáne 42-kvartaldar) órttiń tutanýyna baılanysty Semeı qalasynyń aýmaǵynda jergilikti aýqymda tabıǵı sıpattaǵy tótenshe jaǵdaı rejımi jarııalansyn», - delingen Semeı qalasynyń ákimi Nurbol Nursaǵatovtyń sheshiminde.

Tótenshe jaǵdaıdy joıý boıynsha shtab basshysy bolyp qala ákiminiń orynbasary Ramıl Dosmaǵanbetov belgilendi.

Aıta keteıik, Abaı oblysynyń Borodýlıha aýdanynda tótenshe jaǵdaı áli de saqtalýda.

«Semeı» ormany rezervatynda órt 8 maýsym kúni shyqqan bolatyn. «Órt naızaǵaıdyń 2 ret soǵýynan shyqqan. Órtti tez arada aýyzdyqtaý múmkin bolmady, oǵan sebep «Semeı ormany» memlekettik orman tabıǵı rezervaty tehnıkasy bıik qum tóbeleri ornalasqan aımaqqa jete almady», - degen bolatyn Abaı oblysy ákiminiń orynbasary Dımıtrıı Garıkov.

Búgin belgili bolǵandaı, orman órtin sóndirýmen aınalysyp jatqan 14 mamanmen baılanys úzilgen. Qazir olardy izdestirý sharalary júrgizilip jatyr.