Orman órti: Eýropa elderi Grekııaǵa kómektesip jatyr

<p>ASTANA. KAZINFORM &ndash; Afıny qalasynyń soltústik-shyǵysynda orman órti órshidi. Qatty jel men aptap ystyq órtpen kúresti aıtarlyqtaı qıyndatyp otyr. Bul týraly <a href="https://ru.euronews.com/my-europe/2024/08/12/greece-wildfires-eu-aid" target="_blank" rel="noopener">Euronews</a> jazdy.</p>

Órtti sóndirýge bir jarym myńnan astam órt sóndirýshi men ondaǵan ushaq jáne tikushaq jumyldyrylǵan. Barlyq tótenshe jaǵdaılar qyzmeti oqıǵa ornynda. Polıtsııa turǵyndardy habardar etýge jáne órt pen tútinde qalǵan eldi mekenderdi tutas evakýatsııalaýdy uıymdastyrýǵa kómektesip jatyr.

«Jel áýeli bir jaqqa, sosyn ekinshi jaqqa aýysady. Tútin tynys alýdy qıyndata tústi. Eshteńe kórinbeıdi. Kózim jasaýrap ketti. Biz óz úıimizdi kórmedik. Odan 50 metrdeı jerde boldyq. Biraq biz ony kóre almadyq. Tipti sý aǵyzyp jatqan tikushaqty da kórmedik, tek daýsyn estidik», - deıdi úıinen qashýǵa májbúr bolǵan jergilikti turǵyn.

Jeksenbide Afıny Brıýsselge ár túrli elderdiń kúsh-jigerin úılestire alatyn jáne kólik shyǵyndaryn tóleı alatyn Eýropalyq Odaqtyń azamattyq qorǵanys mehanızmin qoldanýdy surady.

Italııa men Frantsııa ormandaǵy órtti sóndirý úshin ushaqtaryn jiberdi, al Chehııa órt sóndirýshiler otrıady men jerústi tehnıkasyn jabdyqtaǵan.

Bıyl maýsym men shilde Grekııadaǵy meteorologııalyq baqylaý tarıhyndaǵy eń ystyq aılarǵa aınaldy. Qazir keı aımaqtarda aýa temperatýrasy 40 gradýsqa deıin barǵan. Meteorologtardyń boljamynsha, Grekııanyń jartysy apta boıy orman órti qaýpiniń «qyzyl aımaǵynda» bolady.

Buǵan deıin habarlanǵandaı, orman órtiniń taralýyna baılanysty Afıny mańyndaǵy eldi mekender evakýatsııalanyp jatyr.