Organıkalyq ónimderdi eksporttaý naryqtary keńeıtilmek
Zań jobasyn Parlamentiniń depýtattary organıkalyq ónim óndirý jáne onyń aınalymy salasyndaǵy zańnamany jetildirý úshin ázirledi. Qujat tabıǵı resýrstardy utymdy paıdalanýdy qamtamasyz etýge, organıkalyq ónimniń ishki naryǵyn qalyptastyrýǵa jáne damytýǵa járdemdesýge, syrtqy naryqtarda otandyq óndirýshilerdiń organıkalyq ónimderiniń básekege qabilettiligin arttyrýǵa baǵyttalǵan. Zań jobasynda organıkalyq ónim óndirisine kóshý sharttary, ony óndirýge jáne tańbalaýǵa, ımporttyq organıkalyq ónim aınalymyna qoıylatyn tikeleı talaptar eskeriledi, organıkalyq ónimdi esepke alý jáne qadaǵalaý júıesi engiziledi.
«Ózderińiz baıqap otyrǵandaı, zań jobasy organıkalyq ónim óndirý máselelerin ǵana emes, olardyń ónim aınalymy máselelerin de retteıdi. Ekinshiden, «organıkalyq» ónimniń tabıǵaty men qasıetterine qatysty tujyrymdamalyq uǵymdar jetildirildi, ıaǵnı «organıkalyq ónim», «organıkalyq ónim aınalymy», «organıkalyq ónimdi esepke alý jáne qadaǵalaý júıesi», organıkalyq ónimdi tańbalaý» jáne basqa da jańa uǵymdar engizildi», - dedi Senat depýtaty Álı Bektaev.
Sonymen qatar ol ónimdi emes, organıkalyq ónimdi óndirý protsesin sertıfıkattaý usynylǵanyn aıtty. Bul tásil óndiris protsesterin naqtylaıdy jáne halyqaralyq tájirıbege sáıkes keledi.
«Organıkalyq ónim óndirýshilerdiń toptyq sertıfıkattaýdan ótý múmkindigi qarastyrylyp otyr. Bul organıkalyq óndirýshilerdi kooperatsııalaý men biriktirýge jáne naqty óndirýshi úshin sertıfıkattaý shyǵyndaryn tómendetýge yqpal etedi. Budan bólek, tyń jáne tyńaıǵan jerler ótpeli kezeńsiz organıkalyq ósimdik sharýashylyǵy aınalymyna engiziletin bolady. Qoldanystaǵy zańnama boıynsha konversııalyq kezeń kem degende bir jyldy quraıdy jáne ol barlyq jerlerge taralady», - dedi senator.
Onyń sózine qaraǵanda, organıkalyq eginshilikte paıdalanýǵa jaramdy tuqymdar, balyq, mal basy jáne organıkalyq óndiriske ruqsat etilgen, onyń ishinde Eýropalyq komıssııamen kelisilgen tyńaıtqyshtar tizimderi bekitiledi. Bul norma organıkalyq tuqymdardy, tehnologııalardy, ádisterdi, organıkalyq óndiris quraldary men tájirıbelerin izdeýge baılanysty kóptegen óndiristik máselelerdi sheshýge baǵyttalyp otyr. Sonymen qatar, zań jobasymen organıkalyq ónimderdiń sapasyn baǵalaýǵa, Qazaqstanǵa ımporttalatyn organıkalyq ónimdi jetkizýge, tańbalaýǵa jáne ótkizýge, sala boıynsha memlekettik organdardyń quzyretterine qatysty birshama ózgeris engizildi.
Budan buryn habarlanǵandaı, organıkalyq ónim eksporty boıynsha Qazaqstan 123 eldiń ishinde 9-orynda tur.