Óreskel zań buzýshylyqtardyń bolmaýy saılaýdyń ashyq ári zańdy ótip jatqanyn bildiredi - Bas prokýratýra

ASTANA. QazAqparat - Óreskel zań buzýshylyqtardyń bolmaýy saılaýdyń ashyq ári zańdy ótip jatqanyn bildiredi. Bul týraly búgin QR Ortalyq kommýnıkatsııalar qyzmetinde ótken baspasóz máslıhatynda QR Bas prokýratýrasynyń resmı ókili Nurdáýlet Súıindikov málim etti.

Bas prokýratýra ókiliniń aıtýynsha, prokýratýra organdary saılaý zańnamasynyń buzylý faktileri boıynsha buǵan deıin aıtylǵandardan ózge qadaǵalaý aktilerin engizgen joq.

«Daýys beriletin kúnniń aldyndaǵy kezeńde Parlament Májilisi saılaýy boıynsha prokýratýra organdaryna 3 ótinish kelip tústi. Máselen, azamatsha Valentına Bezrýkova ózin ózi usynyp, Májilis depýtattyǵyna kandıdat retinde tirkelgisi keletinin aıtyp, odan bas tartqan saılaý komıssııasyna shaǵym jasady. Prokýratýra organdary ol azamatqa Májilis depýtattyǵyna kandıdattar tek saıası partııalardyń tizimimen usynylatynyn túsindirdi. Jalpy, saılaý zańnamasyn óreskel buzý oqıǵalarynyń bolmaýy, bizdiń pikirimizshe, saılaý protsesi barynsha ashyq jáne zańdy ótip jatqandyǵyn bildiredi», - dedi N.Súıindikov.